Merki qant zaýyty sharýalar aldyndaǵy qaryzynyń 640 mıllıon teńgesin tóledi
TARAZ. QazAqparat – Jambyl oblysynyń ákimi Berdibek Saparbaev qant qyzylshasyn ósirýmen aınalysatyn sharýa qojalyqtarynyń basshylarymen kezdesti, - dep habarlaıdy QazAqparat oblys ákimdiginiń resmı saıtyna silteme jasap.
Kezdesý barysynda «Merki qant zaýyty» JShS-niń aýyl sharýashylyǵy taýaryn óndirýshilerdiń aldyndaǵy bereshegin óteý, sondaı-aq qant óndirisin odan ári damytý jáne qoldaý máseleleri talqylandy.
«Biz Merki qant zaýytynyń basshylyǵymen kelissózder júrgizip jatyrmyz. Bul máseleni sheshý úshin bıýdjetten 180 mıllıon teńge bólindi. Bizdiń alǵashqy kezdesýimizde qant zaýytynyń qaryzy 1 mıllıard teńgeden asatyndyǵy aıtylǵan. Búginge deıin sizderge 640 mıllıon teńgeden astam qarjy tólense, zaýyt basshylyǵy kelesi aptada taǵy 135 mıllıon teńgeni óteıtindigine sendirip otyr. Bul másele bizdiń baqylaýymyzda bolady», - dedi Berdibek Saparbaev.
Aımaq basshysy fermerlerdi birigýge shaqyryp, qyzylsha ósirýshiler qaýymdastyǵyn qurýdy usyndy.
«Biz sizderdi árqashan qoldap keldik, aldaǵy ýaqytta da qoldaıtyn bolamyz. Óz kezekterińizde sizder de birigip, qaýymdastyq quryp, egis alqabyn kóbeıtýlerińiz mańyzdy. Oblys aýdandarynan birneshe qant shyǵaratyn shaǵyn zaýyttardyń qurylysyn salýdy qarastyrý qajet. Bul iste sizderge «Taraz» ÁKK qol ushyn beredi. Bizdiń mindetimiz –búkil Qazaqstandy qantpen qamtamasyz etip qana qoımaı, sonymen qatar eksportqa ónim shyǵarý», - dedi oblys ákimi.
Óz kezeginde aımaqtyń qyzylsha ósirýshileri ózekti máselelerdi sheshýge, sonyń ishinde tuqymmen qamtamasyz etýge, «Ammofos» fosforly tyńaıtqyshtaryn jeńildikpen satyp alýǵa jáne sýbsıdııalaýǵa kómekteskeni úshin alǵystaryn bildirdi.
