Merki-Býrylbaıtal jolyn jóndeý jumysy jalǵasyp jatyr

TARAZ. QazAqparat – Jambyl oblysynda júrgizilgen jumystardyń nátıjesinde byltyr jaqsy jáne qanaǵattanarlyq jaǵdaıdaǵy joldardyń úlesi 85-ten 90 paıyzǵa, al kóshe jelileri 76 paıyzǵa artty. Aıta ketý kerek, bul - respýblıka boıynsha ekinshi oryndaǵy kórsetkish, dep habarlaıdy QazAqparat tilshisi.

Barlyq qarjylandyrý kózinen ótken jyly 27,6 mıllıard teńge bólinip, 1111 joba iske asyryldy. Barlyǵy 1316,2 shaqyrym jol jóndeldi.

Ótken jylmen salystyrǵanda ósim 2,5 eseden asty. Jobalardyń basym bóligi, ıaǵnı 827 joba «Jumyspen qamtýdyń jol kartasy» baǵdarlamasy aıasynda júzege asqan.

Respýblıkalyq bıýdjettiń qoldaýymen úsh iri joba júıesin taýyp, eki nysan paıdalanýǵa berildi. Al Taraz qalasynyń ońtústik aınalma jolynyń Qyrǵyzstan shekarasyna deıingi jolynyń uzyndyǵy 16,1 shaqyrymdy quraıtyn ýchaskesin qalpyna keltirý jobasy aǵymdaǵy jyldyń birinshi jartysynda aıaqtalady.

Sondaı-aq respýblıkalyq «Uzynaǵash-Otar» avtojolynyń 16 shaqyrymdyq bóligi paıdalanýǵa berildi.

Jalpy uzyndyǵy 475 shaqyrymdy quraıtyn «Merki-Býrylbaıtal», «Balqash-Býrylbaıtal», «Kúrti-Býrylbaıtal» ýchaskelerinde qaıta jóndeý qurylys jumystary júrgizilýde. Jobalardyń jalpy quny - 164 mıllıard teńge.

«Aımaqta basty nazar jol salý sapasyna aýdarylyp otyr. Osy maqsatta «Jol aktıvteriniń sapasy ortalyǵy» bizdiń basqarmamen birlesip, taldaý jasaýǵa myńnan asa synama alyp, 153 eskertý berdi. Olar boıynsha jobalardy iske asyrý barysynda tıisti jumystary atqaryldy», – deıdi oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.

Jalpy, jumys sapasyn arttyrý jol-kólik oqıǵalaryn – 23, jaraqat alýdy – 28, qaza tabý oqıǵalaryn 10,4 paıyzǵa azaıtýǵa múmkindik berdi.

Premer-mınıstr Asqar Mamınniń basshylyǵymen ótken kezdesýde Indýstrııa jáne ınfraqurylymdy damytý mınıstri Beıbit Atamqulov oblystaǵy joldardyń sapasyn jaqsartý men qarjylandyrý qaǵıdattaryn aıryqsha atap ótken bolatyn.

Jalpy 2020-2025 jyldarǵa arnalǵan ınfraqurylymdy damytý baǵytynda «Nurly jol» baǵdarlamasy aıasynda oblys jalpy somasy 52 mıllıard teńgege 82 jobany iske asyrýdy usyndy.

Eger bul jobalar maquldansa, jaqsy jáne qanaǵattanarlyq jaǵdaıdaǵy joldardyń úlesi 2025 jyly 100 paıyzǵa jetpek.