«Merki-Býrylbaıtal» avtojolyna kúrdeli jóndeý jumystary bastaldy
NUR-SULTAN. QazAqparat - Jalpy uzyndyǵy 262 shaqyrym bolatyn «Merki-Býrylbaıtal» baǵytyndaǵy avtojol 4 ýchaskege bólinip jóndeletin bolady, dep habarlaıdy QazAqparat «QazAvtojol» AQ-ǵa silteme jasap.
Ulttyq kompanııanyń habarlaýynsha, áýeli Merki kentinen Shý qalasyna deıingi 86 km jol ýchaskesi 4 jolaqty qozǵalysy bar І-shi tehnıkalyq sanatty jol retinde qaıta jaraqtalmaq. Al, Shý qalasynan bastap Býrylbaıtal aýylyna deıingi 176 shaqyrymdy quraıtyn 3 ýchaske 2 jolaqty II-shi tehnıkalyq sanattaǵy jol retinde jóndeledi.
Sonyń nátıjesinde Tátti, Shý, Birlik eldi mekenderi arqyly ótetin jol tolyǵymen jańartylady.
Joldyń asfalt jabyny jańartylyp qana qoımaı, sol jol boıynda 6 kópir, 3 temirjol ótkeli, 11 jaryqtandyrylǵan kólik aıryǵy, 276 sý ótkizý qubyry, aıaldaý alańdary, avtopavılondar salynady.
«Atalmysh jolǵa tózimdiligi joǵary, qıyrshyq tasty mastıkalyq asfaltbeton tóseledi. Jobany tolyq aıaqtaý 2022 jyldyń maýsym aıyna josparlanyp otyr» - delingen kompanııa taratqan aqparatta.
