Merkige saıahat: kórikti oryndar men jaıly aıaldaý oryndary

Sapardyń baǵytyn uzaq josparlamaı-aq qyzyqty demalys uıymdastyrýǵa bolatyn óńirlerdiń biri – Merki aýdany. Munda tabıǵat, tarıh jáne jergilikti taǵamdardyń birin tańdaý qajet emes. Bir kúnniń ishinde taý shatqalyn aralap, ózen jaǵasynda serýendep, ejelgi tas músinderdi tamashalap, jergilikti irimshiktiń dámin tatyp, sapardy ystyq kúıinde daıyndalǵan forelmen aıaqtaýǵa bolady.

Tarazdan aýdan ortalyǵyna deıin shamamen 157 shaqyrym, al Almatydan 337 shaqyrym. Sondyqtan munda demalys kúnderi arnaıy kelýge de, elimizdiń ońtústigi arqyly ótetin jolda aıaldaýǵa da qolaıly.

Bul óńirge jaqyndaǵan saıyn keń jazyq birtindep Qyrǵyz Alataýynyń bókterine ulasyp, aýa raıy salqyndaı túsedi. Kádimgi avtojoldyń ózi taýǵa bastaıtyn shaǵyn saıahattyń bastaýyna aınalady.

Aıta ketý kerek, sapardy eń aldymen Merki shatqalynan bastaǵan jón. Óıtkeni aýdannyń tabıǵatymen tanysýǵa arnalǵan eń qoljetimdi baǵyttardyń biri. Munda asyqpaı serýendep, ózenniń syldyryna qulaq túrip, tabıǵat aıasynda demalyp, pıknık uıymdastyryp nemese kórinis alańdaryna kóterilip, birneshe saǵatty tynysh ári jasyl jelek arasynda ótkizýge bolady.

Shatqal balalarmen kelgen otbasylarǵa da, dostarmen saıahattaýshylarǵa da, qıyn joryqsyz-aq taýdyń erekshe atmosferasyn sezingisi keletinderge de qolaıly.

Sonymen qatar belsendi demalysty unatatyndar úshin atpen serýendeý usynylady. At ústinde júrip, marshrýttyń bir bóligin múlde basqa yrǵaqpen tamashalaýǵa bolady. Tabıǵatty jaqynyraq sezingisi keletin, biraq kúndi aýyr trekkıngke arnaǵysy kelmeıtin saıahatshylar úshin jaqsy tańdaý.

Eger ýaqyt jetkilikti bolsa, Merki taýlarynda alpilik shalǵyndar men kóne balbal tastardy kórýge bolady. Bul tas músinder aýdannyń eń tanymal tarıhı eskertkishteriniń biri sanalady.

Mundaı baǵytqa aldyn ala daıyndalǵan durys. Joldy naqtylap, jolserikpen kelisip, aýa raıyn tekserip, yńǵaıly aıaq kıim tańdaý qajet. Sonda qarapaıym serýenniń ornyna taýdyń qoınaýynda saqtalǵan kóne tarıhqa saıahat jasaýǵa múmkindik týady.

Merki irimshigi de óńirdiń gastronomııalyq brendine aınalǵan. Ony osy jerde dámin tatyp kórýge nemese jolǵa estelik retinde satyp alýǵa bolady. Al shatqaldy aralaǵannan keıin jergilikti forel, ystyq shaı, tandyr nan, sút ónimderi, maýsym kezinde qymyz ben saýmal sapardyń erekshe áserin tolyqtyra túsedi.

Sondyqtan Merki tek taý kórýge keletinder úshin ǵana emes, ártúrli demalys túrin qalaıtyndar úshin de qolaıly baǵyt. Munda ózen jaǵasynda tynysh serýendeýge, otbasylyq pıknık ótkizýge, atpen qydyrýǵa, balbal tastarǵa barýǵa nemese jergilikti taǵamdardan dám tatýǵa bolady.

Merkige bir ǵana kórikti oryn úshin emes, tabıǵat aıasynda tynyǵyp, tarıhı oryndardy aralap, jergilikti taǵamdardan dám tatý úshin barǵan jón. Birneshe saǵattyń ózi bul óńirdiń sulýlyǵyn sezinýge jetkilikti bolǵanymen, bir kúnniń ózi azdyq etýi múmkin.

Qaıda qonýǵa bolady?

Túneıtin oryn retinde Keruen Inn qonaqúıin tańdaýǵa bolady.

Qonaqúıler jelisiniń biri Jambyl oblysy Merki aýdanynda, Merki kentiniń batys jaǵyndaǵy Aqtoǵan aýyly mańynda, «Batys Eýropa – Batys Qytaı» halyqaralyq avtodáliziniń boıynda ornalasqan.

Avtosaıahatshylar úshin osy qonaq úı uzaq joldan keıin tynyǵýǵa qolaıly oryn. Qonaqúıde 30-dan astam jaıly bólme, jeńil jáne júk kólikterine arnalǵan keń avtoturaq, sondaı-aq dámhana, dúken jáne dárihana jumys isteıdi.

Jaqyn mańda Qazaq Oil janarmaı quıý beketi ornalasqan, sondaı-aq elektr kólikterine arnalǵan qýattaý stantsııalary bar.

Tańerteń kofe iship, kólikke janarmaı quıyp, jolǵa qajetti sý men azyq-túlik alyp, ári qaraı Tarazǵa, Almatyǵa nemese Merkidegi áli kórip úlgermegen kórikti jerlerge saparyńyzdy jalǵastyra alasyz.