Merkel Facebook-te násilshil sıpattaǵy posttardyń taralýyna baılanysty narazylyq bildirdi
ASTANA. QazAqparat - Germanııa kantsleri Angela Merkel Facebook áleýmettik jelisi basshylyǵynyń Berlınniń atalǵan áleýmettik jelide ksenofobtyq jáne násilshildik joldaýlardyń taralýyna qarsy is-áreket etý nıetine asa mán bermeı otyrǵany úshin narazylyq bildirdi.
Osyǵan baılanysty úkimet basshysy senbi kúni Nıý-Iorktegi BUU sharalarynyń birinde Mark Tsýkerbergke osy másele boıynsha narazylyǵyn jeke aıtty.
Bloomberg agenttiginiń málimetterine sáıkes, Merkel Facebook basshysyna beıresmı jaǵdaıda tıisti suraǵyn qoıdy. Tsýkerberg: «Biz onymen áli jumys isteýimiz kerek», - dep jaýap bergen.
Kantsler odan taǵy: «Osy baǵytta jumys júrgizip jatyrsyz ba?» - dep suraǵan. Tsýkerberg oǵan «Iá» dep jaýap bergen.
GFR-ǵa bosqyndardyń kóptep kelýi jáne tym ońshyl radıkaldardyń qımyldarynyń jaǵdaıynda Merkel 11 qyrkúıekte baspasózge bergen suhbatynda Facebook basshylyǵyn áleýmettik jelide ksenofobtyq mazmundaǵy pikirlerdiń taralýymen belsendirek kúresýge shaqyrdy.
«Adamdar áleýmettik jelilerde turǵyndardyń bir bóligin ekinshisine qarsy shaǵystyryp otyrǵanda, olarǵa tek memleket qarsylyq kórsetip qoımaı, Facebook kompanııasy da osyndaı pikirlerdiń taralýymen kúresýi tıis», - dep atap ótti Merkel.
Kantsler Facebook-tiń erejeler jınaǵy bar ekenin, biraq olardy «is júzinde qoldaný qajet bolyp turǵanyn» aıtty.
14 qyrkúıekte Facebook qosymsha sharalar qabyldaýǵa, atap aıtqanda, sarapshylyq top quryp, Germanııadaǵy arandatýshylarǵa qarsy naýqandy bastaýdy ýáde etken, dep jazady TASS.
