Merkel Býndestagta Mertstiń kantsler bolyp saılanýyna qatyspaq

ASTANA. KAZINFORM –  Germanııanyń burynǵy kantsleri Angela Merkel (2005–2021 jj. qyzmet atqarǵan) 2025 jylǵy 6 mamyrda Federaldyq kantslerdi saılaý kezinde Býndestag otyrysyna qurmetti qonaq retinde qatysady, dep habarlaıdy TASS.

Bul týraly RND redaktsııalyq birlestigi Merkel keńsesiniń ókiline silteme jasap habarlady.

— Men Germanııanyń burynǵy kantsleri Merkeldiń 2025 jylǵy 6 mamyrda Germanııa Federatıvtik Respýblıkasynyń federaldyq kantslerin saılaý jáne ant berý rásimine qurmetti qonaq retinde qatysatynyn rastaı alamyn, — dedi ókil.

Merkel men Hrıstıan-demokratııalyq odaǵynyń (HDS) qazirgi kóshbasshysy Frıdrıh Merts arasyndaǵy qarym-qatynas uzaq jyldar boıy salqyn bolǵan. Merts 2000–2002 jyldary HDS parlamenttik fraktsııasyn basqarǵan kezde Merkelmen arada kelispeýshilik týyndap, ol saıasattan ketken. Alaıda 2018 jyldyń sońynda saıasatqa qaıta oralǵan. 23 aqpanda ótken merziminen burynǵy parlament saılaýynda Merkel HDS/HÁO blogynyń jeńisimen Mertsti quttyqtady.

Sol kúni Germanııada ótken saılaýda HDS/HÁO blogy 28,5% daýys jınap, birinshi orynǵa ıe boldy. Ekinshi orynǵa alǵash ret «Germanııa úshin alternatıva» partııasy (20,8%) shyqty. Úshinshi oryndy qazirgi kantsler Olaf Sholtstyń Sotsıal-demokratııalyq partııasy 16,4% daýyspen ıelendi. Odan keıin «Jasyldar» (11,6%) men Solshyl partııa (8,8%) ornalasqan.

Aıta ketelik Danııadan Germanııaǵa deıin joǵary jyldamdyqty týnnel salynyp jatqanyn jazǵan edik.