Merki qant zaýytyndaǵy uzyn-sonar kezek: fermerlerdiń qyzylshasy dalada qalmaı ma
ASTANA. KAZINFORM – Qarashanyń sońynda Merki qant zaýytynda uzyn-sonar kezek paıda boldy. Sebep - zaýyt fermerlerden qant qyzylshasyn qabyldap úlgermeı jatyr. Máseleniń mán-jaıyn Jambyl oblysynyń ákimi Erbol Qarashókeevten suraǵan edik.
— Bıyl 11,2 myń gektar jerge qant qyzylshasy egildi. Keıingi bes jyldy alyp qarasańyz, qant qyzylshasynyń ortasha ónimdiligi gektaryna 350 tsentnerden aspaıtyn. Bıyl aýa raıy qolaıly boldy, sý tapshylyǵy bolmady, sol sebepten ónimdilik ósti. Qant qyzylshasynyń 84%-y jınaldy, qazir zaýyttarǵa tasymaldap jatyr. Jalpy 450 myń gektardan jınalǵan ónimdi Merki qant zaýytyna aparamyz dep josparlap otyrmyz, onyń ishinde 340 gektar zaýytqa jetkizilip, 160 myń tonnasy óńdelip, qant shyǵaryldy. Qant zaýytyndaǵy kezek keıingi 30 jyl boıy qaıtalanyp keledi. Qyzylsha qysqa merzimde jınalady, ony tapsyrýǵa kezek bolady. Biz bul máseleniń aldyn alý maqsatynda Merki qant zaýytynyń qasynda qosymsha alań ashtyq. Ol alańǵa 30 myń tonna qant qyzylshasy jınaldy. Aqsý qant zaýytyna 30 myń tonna qyzylsha jetkizildi, — dedi Erbol Qarashókeev oblystyń áleýmettik-ekonomıkalyq damýy týraly esep berý barysynda.
Ákimniń aıtýynsha, qant qyzylshasyn ótkizý máselesi sheshilip jatyr.
— Memleket tarapynan sýbsıdııalaý jaǵyn pysyqtap jatyrmyz, oblystyq bıýdjetten 3,4 mlrd teńge sýbsıdııa berildi, endi respýblıkalyq bıýdjetten 5 mlrd teńge qarjy kútilip otyr. Problemany júıeli sheshý úshin Taraz qant zaýytyn jańǵyrtýdy qolǵa aldyq. Qazir jobalyq-smetalyq qujattardy daıyndap jatyr, jeltoqsannyń ortasynda zaýyt ıelerimen kezdesemiz. Máseleni júıeli sheshý úshin taǵy bir qant zaýytyn qamtamasyz etýimiz kerek, — dep tolyqtyrdy óńir basshysy.