Merıem, Rasýl, Gamzat: Shymkentte úshem dúnıege keldi
ShYMKENT. KAZINFORM — Shymkent qalasynyń 39 jastaǵy turǵyny Fatıma ıAkýbova úshem bosandy.
Shymkent qalalyq perzenthanasynda úshem — bir qyz jáne eki ul bala — dúnıege keldi. Júktiliktiń 31-shi aptasynda jaryq dúnıe esigin ashqan nárestelerdiń salmaǵy — 975, 1765 jáne 1920 gramm boldy. Olar birneshe mınýt aıyrmashylyqpen týyldy.
56 kún boıy sábıler men olardyń 39 jastaǵy anasy dárigerlerdiń jiti baqylaýynda bolyp, qajetti em men kútim aldy. Qazirgi ýaqytta balalardyń da, ananyń da jaǵdaıy jaqsy. Búgin úılerine shyǵaryldy.
Fatıma Shamsýtdınqyzynyń bul ekinshi bosanýy. Endi ol jubaıy Zýhreıdınmen tórt balanyń ata-anasy atandy. Al, nárestelerge Merıem, Rasýl, Gamzat esimderi berildi.
Aıta keteıik, jyl basynan beri Shymkentte 15 793 sábı dúnıege keldi. Onyń 7726 qyz bolsa, 8067 ul bala. Sondaı-aq, 180 egiz, 3 úshem bar.
Eske sala keteıik, budan buryn Qazaqstanda Otbasyn qoldaý ortalyqtarynyń sany úsh ese artqanyn jazǵan bolatynbyz.