Mergender Olımpıada joldamalary sarapqa salynatyn álem chempıonatyna daıyndalyp jatyr
ASTANA. KAZINFORM — Qazaqstannyń nysana kózdeýden ulttyq quramasy qarasha aıynyń basynda ótetin álem chempıonatyna negizgi qurammen qatysýdy josparlap otyr. Bul týraly bas bapker Olga Dovgýn Ulttyq olımpıada komıtetiniń resmı saıtyna bergen suhbatynda aıtty.
Mamannyń sózinshe, álem chempıonatynda Olımpıada oıyndaryna beriletin joldamalar sarapqa salyna bastaıdy. Qazir sportshylar daıyndyqty jalǵastyryp jatyr, al aldaǵy Gran-prı týrnıri álem birinshiligine ázirliktiń mańyzdy kezeńderiniń biri bolmaq.
Dovgýn 2026 jylǵy Azııa oıyndaryndaǵy komandanyń nátıjesine tolyq kóńili tolmaǵanyn da jasyrmady. Qazaqstandyq mergender jarysta eki qola medal jeńip alǵanymen, birneshe jattyǵýda júldege qol jetkizýge nebári bir upaı jetpeı qalǵan.
Bas bapkerdiń pikirinshe, sportshylar tehnıkalyq turǵydan jaqsy daıyndalǵanymen, keıbir sheshýshi sátterde psıhologııalyq qysymǵa tótep berý qıynǵa soqqan. Endigi mindet — osy tájirıbeni eskerip, álem chempıonatynda bar múmkindikti tıimdi paıdalaný.
Eske sala keteıik, buǵan deıin qazaqstandyq mergender Azıadada júldege bir qadam jetpeı qalǵan edi.
