Mereıli jasqa tolǵan aqynǵa qurmet kórsetildi
Osyǵan oraı oblys ákimi Nurlan Uranhaev aqyndy mereıli jasymen quttyqtap, qurmet kórsetti.
«Tynyshtyqbek Ábdikákimuly Sizdi 70 jas mereıtoıyńyzben shyn júrekten quttyqtaımyn! Siz mereıli jasqa tolyp jatqanda ózińizben betpe-bet kezdesip, kózbe-kóz quttyqtaýdy jón sanadyq. Ádebıetti baǵyndyrý úshin Almaty nemese Astanaǵa ketpeı-aq, týǵan jerde júrip te qoltańba qaldyrýǵa bolatynyn dáleldegen birden-bir aqyn ózińiz. Sizdiń týǵan jerge degen adaldyǵyńyz – kópke úlgi-ónege.
Sonaý 90-jyldardyń basynda ádebıet álemine atyńyzdy shyǵarǵan «Aqsham hattary» jyr jınaǵyńyz bárimizdiń esimizde. Odan keıin de kóptegen óleńder jınaǵyńyz jaryq kórdi. Sizge qarap boı túzep, sizge eliktep óleń jazǵysy keletin artyńyzda birneshe býyn ósip jetildi. Bunyń bári sizdiń qalam ustaǵan oı eńbegińizdiń arqasy dep bilemiz. Aldaǵy ýaqytta da ádebı murańyz kóbeıe beretinine senemiz. Eń bastysy ózińizge densaýlyq, otbasyńyzǵa amandyq tileımin», - dedi Abaı oblysynyń ákimi Nurlan Uranhaev.
Jazýshy shyǵarmashylyǵynyń Abaı óńiriniń turǵyndary úshin alar orny erekshe ekeni sózsiz. Onyń shyǵarmalary zertteý jumysynyń obektisi, ol óz eńbekterinde dúnıe júzindegi halyqtarǵa ortaq ejelgi qaǵıdalar men kıeli uǵymdardy qazaqtyń ulttyq dúnıetanymy arqyly taldaı bilgen.
Aıta keteıik, Tynyshtyqbek Ábdikákimuly 1953 jyly 20 shildede Abaı aýdanynda týǵan. Semeı oblystyq Mádenıet basqarmasynyń ǵylymı-metodıkalyq ortalyǵynda redaktor, Abaıdyń respýblıkalyq tarıhı-mádenı, ádebı memorıaldyq qoryq-mýzeıinde ǵylymı qyzmetker, respýblıkalyq «Alash úni» gazetinde keńesshi jáne qyzmetin atqarǵan.
Tynyshtyqbek Ábdikárimuly – Qazaqstan Jazýshylar Odaǵynyń múshesi. Qalamgerdiń «Aqsham hattary», «Yraýan», «Alqońyr dúnıe», «Besinshi maýsym jupary» atty jyr jınaqtary, «Qas Saq Ańqymasy» atty eńbegi jáne basqa da shyǵarmalary jaryq kórgen.
