«Mereıli otbasy» jalpyulttyq baıqaýynda Almaty namysyn qorǵaıtyn otbasylar anyqtaldy
ALMATY. QazAqparat - «Mereıli otbasy» jalpyulttyq baıqaýynda Almatynyń namysyn úsh otbasy: UOS ardagerleri Kalınınderdiń otbasy, Dýdaevtardyń medıtsınalyq áýleti jáne kópbalaly Qadyrovtardyń januıasy qorǵaıtyn boldy.
Úlgili otbasylardy marapattaý saltanatyna Almaty ákimi Ahmetjan Esimov, qoǵamdyq uıymdardyń, otbasylardy áleýmettik qoldaý birlestikteri men daǵdarystar ortalyqtarynyń ókilderi qatysty.
Qala ákimi Memleket basshysy Nursultan Nazarbaevtyń bastamasymen qolǵa alynǵan bul baıqaýdyń otbasylyq qundylyqtardy, otbasy men nekeniń ómirsheńdigin úlgi etýde, jalpy otbasynyń mártebesin arttyrýda barynsha mańyzdy ekendigin atap ótti.
«Bul otbasylyq festıvaldiń mańyzy óte zor. Bıylǵy baıqaýǵa byltyrǵy jylǵa qaraǵanda eki ese kóp otbasy qatysty. Olardyń barlyǵy túrli kásiptiń, etnostyń jáne eńbek áýletiniń ókilderi», - dedi Ahmetjan Esimov.
Qala basshysy syılyqtardy tapsyrý barysynda Almatydaǵy otbasylyq- demografııalyq jaǵdaıdyń oń dınamıkasyn atap ótti. Onyń aıtýynsha, sońǵy 5 jyl ishinde megapolıs turǵyndarynyń ortasha ómir súrý jasy 4 jylǵa artyp, 74,6 jasty quraǵan (erler - 70,2, áıelder - 78,3). Ómirge sábıdiń kelý dınamıkasy da turaqty. Mysaly, ótken jyly Almatyda 42 myń náreste dúnıege kelgen, bul - elimizdiń árbir toǵyzynshy balasy. Ana ólimi 6 ese, al sábı ólimi 2 ese tómendegen.
Memleket otbasylarǵa jan-jaqty qoldaý kórsetýde. Náreste ómirge kelgen kezde bir rettik járdem aqsha jáne bala bir jasqa tolǵansha áleýmettik járdem kórsetiledi ári kóp balaly analar da járdem aqsha alady.
«Qoljetimdi baspana» memlekettik baǵdarlamasy aıasynda Almatyda 800-den astam kópbalaly jáne jas otbasy ózge de áleýmettik jaǵynan qorǵalatyn turǵyndarmen birge páter kiltterin aldy.
