«Mereıli otbasy» ulttyq baıqaýyna ótinishter qabyldana bastady
ASTANA. QazAqparat - Elimizde úshinshi jyl qatarynan «Mereıli otbasy» ulttyq baıqaýy jarııalandy. Ony daıyndaý jáne ótkizý boıynsha uıymdastyrý komıteti baıqaýǵa qatysýǵa ótinishter qabyldaýdy bastap ketti, dep habarlaıdy astana.kz.
Dástúr boıynsha sharaǵa otbasy músheleri eńbekte, sportta, shyǵarmashylyqta, ǵylymda jetistikke jetken otbasylar qatysa alady. «Mereıli otbasy» baıqaýy úsh kezeńnen turady: birinshi kezeń - aýdandyq (qalalyq), ekinshi kezeń - oblystyq, úshinshi kezeń - respýblıkalyq. Úzdik otbasyny anyqtaý barysynda qazylar alqasy otbasy músheleriniń jetistikteriniń kóptigi men mańyzyna, otbasylyq dástúrler men jádigelerge, otbasynyń rýhanı-adamgershilik qundylyqtaryna, balalardyń jetistikterine, óziniń túp-tamyryn bilýine, otbasynyń ómir súrý saltyna nazar aýdaratyn bolady. Eske sala keteıik, «Mereıli otbasy» ulttyq baıqaýy adamgershilik qundylyqtardy qaıta jańǵyrtýǵa, otbasy mártebesin kóterýge baǵyttalǵan. Sharanyń maqsaty - otbasy ınstıtýty, adamgershilikti, rýhanılyqty, bala tárbıesindegi ata-ananyń jaýapkershiligin, otbasy qundylyqtaryn nasıhattaý, kámeletke tolmaǵan balalardy eńbekke jaramsyz jáne qart ata-analaryna qamqorlyq jasaýǵa úgitteý, sonymen qatar qazaqstandyq otbasynyń jaǵymdy ımıdjin nasıhattaý. Baıqaýǵa qatysýǵa ótinish qabyldaý aǵymdaǵy aıdyń sońyna deıin jalǵasady.
