«Mereıli otbasy» ulttyq baıqaýy bastaldy
Uıymdastyrý komıtetiniń quramyna Parlament Senatynyń depýtaty, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, óńir ákimderiniń orynbasarlary, mınıstrlik, BAQ-nyń ókilderi, ÚEU-dar, belgili qoǵam qaıratkerleri kirdi.
Óz sózinde mınıstr A.Balaeva adamgershilik qundylyqtardy jańǵyrtýǵa jáne otbasy mártebesin arttyrýǵa baǵyttalǵan ulttyq konkýrstyń ereksheligi men mańyzdylyǵyn atap ótti.
«Jyldaǵy dástúrmen bıyl da «Mereıli otbasy» ulttyq konkýrsyn bastaǵaly otyrmyz. Elbasynyń usynysymen qolǵa alǵan joba – búginde naǵyz halyqtyq merekege aınaldy. Jyl saıyn bul jobaǵa halyqtyń úlken qyzyǵýshylyqpen qatysyp júrgenin kórip otyrmyz. Joba bastalǵannan beri búginge deıin elimizdiń 15 myńnan astam januıasy osy baıqaýǵa qatysty. Munyń ózi – bizdiń qoǵamǵa otbasy qundylyǵyn dáripteıtin, úlgi kórsetetin erekshe jobaǵa aınalǵanyn kórsetedi dep bilemin», - dedi A.Balaeva.
Sondaı-aq, shara barysynda baıqaýdy ótkizýdiń jańa ózgeristeri týraly aıtyldy. «Buryn respýblıkalyq deńgeıde bir ǵana otbasy jeńimpaz bolatyn. Aǵymdaǵy jyldan bastap óńirlik deńgeıde jeńimpaz atanǵan 17 otbasynyń barlyǵyna da Konkýrs laýreaty ataǵy berilip, birdeı marapattalatyn bolady», - dep atap ótti A.Balaeva.
Sonymen birge, bıyldan bastap konkýrsqa qatysýǵa ótinish berý, konkýrs nátıjesi boıynsha marapattaý, konkýrs qorytyndylaryn anyqtaıtyn komıssııa quramyna azamattyq qoǵam ókilderi ǵana emes, sonymen birge konkýrstyń burynǵy jeńimpazdarynyń da kirýi; jeńimpazdardy anyqtaý men baǵalaýdaǵy jańa balldyq júıe boıynsha sharttyq ózgerister engizilgen.
Eske sala keteıik: «Mereıli otbasy» ulttyq baıqaýyna Qujattar qabyldaý 15 maýsymǵa deıin jalǵasady. Baıqaý laýreattaryn marapattaý rásimi jyl saıynǵydaı qyrkúıek aıynda, Otbasy kúni qarsańynda saltanatty túrde ótkiziledi.
