Mereıli otbasy: Shahtınsk qalasynda turatyn kenshiler áýleti jeńimpaz boldy
Bıyl Qazaqstanda 17 jeńimpazdy marapattaý rásimi QR Memlekettik hatshysy Qyrymbek Kósherbaevtyń tóraǵalyǵymen onlaın túrde ótti.
Memleket basshysynyń dıplomyn, músinsheni jáne aqshalaı sertıfıkatty Qaraǵandy oblysynan konkýrs laýreatyna óńir basshysy Jeńis Qasymbek tapsyrdy.
«Mine, birneshe jyl boıy biz barlyq qazaqstandyqtarǵa naǵyz otbasylyq qundylyqtardyń, eńbekqor, uıymshyl, tatý otbasynyń úlgisin kórsetý úshin úlgili otbasylardy tańdap kelemiz. Jalpy eńbek ótili 365 jyldan asatyn, baı eńbek tarıhy bar kenshiler áýletin bizdiń oblysymyzdan jeńimpaz retinde kórip otyrǵanymyzǵa qýanyshtymyz», – dedi ol.
Kosolapovtar otbasy – tórt urpaqqa taraǵan kenshiler.
Otaǵasy Valerıı Kosolapov Lenın atyndaǵy shahtada tik uńǵylardyń úńgileýshisi, al jubaıy Lıýdmıla Volokıtına – aǵa tabelshi bolyp jumys isteıdi.
18 jyl buryn neke qurǵan jáne qazirgi kúni eki ul tárbıelep otyr.
«Biz osyǵan deın de «Mereıli otbasy» baıqaýyna qatysqan bolatynbyz. 2017 jyly qalalyq týrda birinshi oryn aldyq. Bul jolǵy jeńis - biz úshin kútpegen oqıǵa boldy. Sebebi myqty jáne osy ataýǵa laıyqty qarsylastar kóp boldy. Biz - qarapaıym tatý jáne kópultty otbasymyz. Bizde dástúr sabaqtastyǵy saqtalǵan. Balalardy otbasylyq qundylyqtar rýhynda tárbıeleımiz», – deıdi Lıýdmıla Volokıtına.
Jeńimpaz otbasynyń aıtýynsha, olardyń shańyraǵynda ornaǵan baqytty nekeniń basty qupııasy – ózara kómek pen túsinistik.
Erli-zaıyptylar úılenip, balalary bolǵannan beri «men» sózin umytyp, ony «biz» degenge aýystyrǵan.
Esterińizge sala keteıik, «Mereıli otbasy» ulttyq baıqaýy adamgershilik qundylyqtardy jańǵyrtýǵa jáne otbasy men nekeniń oń beınesin nasıhattaýǵa, sondaı-aq otbasy mártebesin arttyrýǵa baǵyttalǵan.
Ol Elbasynyń bastamasymen 2014 jyldan beri ótkizilip keledi.
