«Mereıli otbasy» respýblıkalyq baıqaýyna barsha Qazaqstannan 16 úzdik otbasy qatysady
ASTANA. QazAqparat - QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri Otbasy kúnimen birge bekitilgen «Mereıli otbasy» baıqaýy týraly aıtyp berdi.
«Baıqaýǵa qatysatyn ár otbasynyń óz ereksheligi bar. Óńirlerde jumys istegen komıssııalar úshin respýblıkalyq týrǵa irikteý júrgizý qıyn boldy», - dedi komıssııa tóraǵasy Mahabbat Bekbosynova. Baıqaýdyń aımaqtar men oblystardaǵy jeńimpazdary qazylar alqasymen anyqtaldy. «Astana qalasynda Ahmetovter otbasy úzdik atandy. Bul temirjolshylar áýletinde 67 adam bar. Almatyda Jumaevtar otbasy - alpınıster jeńiske jetti. Otaǵasy álemniń 14 shyńyn baǵyndyrǵan eken. Aqmola oblysynda pedagogtar áýleti top jardy, olardyń qyzmet ótili 300 jyldan asady», - deıdi Mahabbat Bekbosynova. Ulttyq komıssııa ókilderiniń atap ótýinshe, baıqaýdyńmaqsaty - otbasy mártebesin arttyrý jáne nyǵaıtý, Memleket basshysy atalǵan qoǵamdyq ınstıtýtty damytýǵa jáne saqtaýǵa erekshe nazar aýdarady. Bıyl elordalyq baıqaýǵa 44 otbasy qatysty, sonyń ishinde muǵalimder, temirjolshylar, dárigerler, sportshylar jáne t.b. Ár áýlet úshin «Mereıli otbasy» baıqaýy - onyń jetistikteri men tabystarynyń kórsetkishi. Qazirgi ýaqytta ulttyq baıqaýdyń aýdandyq jáne oblystyq, sondaı-aq, Astana men Almaty qalalary deńgeıindegi 2 kezeńi ótkizildi. Jeńimpaz atanǵan 16 otbasy fınalǵa ótti. Elimizdiń úzdik otbasy SMS jáne ınternet daýys berýdiń qorytyndysy boıynsha anyqtalady, al jeńimpazdyń esimi qyrkúıek aıynda grand-fınalda barsha Qazaqstanǵa jarııalanady.
