Mereıli otbasy: Qyzylordada Ábildashevter áýletine qurmet kórsetildi
El Táýelsizdiginiń 30 jyldyq mereıtoıy men Otbasy kúni aıasynda «Mereıli otbasy-2021» ulttyq baıqaýynyń jeńimpazdary marapattaldy. Saltanatty shara epıdemıologııalyq ahýalǵa baılanysty Nur-Sultan qalasynan tikeleı qosylym arqyly ótti.
Onlaın shara barysynda ónegeli otbasylar týraly ázirlengen beınerolıkter kórsetildi. Aldaǵy ýaqytta úlgili shańyraq ıeleri týraly arnaıy fılm kópshiliktiń nazaryna usynylady.
Tikeleı kórsetilim barysynda ár óńirdiń basshylary «Mereıli otbasy» atanǵan áýletterdi quttyqtady.
Oblys ákimi Gúlshara Ábdiqalyqova ónegesimen úlgi bolǵan Ábildashevter otbasyna Memleket basshysynyń dıplomyn, arnaıy músinshe men syılyq sertıfıkattaryn tabystady.
Buǵan deıin aımaqtyq konkýrstyń bas júldesin ıelengen shıelilik Ábildashevterdiń ónegeli ómiri kópke úlgi. Otbasy músheleriniń kóbisi uzaq jyldar boıy aımaqtyń aýyl sharýashylyǵy salasyna súbeli úles qosqan. Shazat Ábildashev pen Shyryn Ábildashevanyń otaý qurǵanyna 59 jyl bolǵan. Búginde 10 balasynan 42 nemere men 12 shóbere súıip, beınetteriniń zeınetin kórip otyr. Úlken uly Nuǵman Ábildashev respýblıkaǵa belgili ǵalym-agronom. Jylyjaıda kókenis ósirýmen aınalysady.
Baıqaýdyń maqsaty - ónegeli qundylyqtardy jańǵyrtý, balalardy tárbıeleýde ata-ananyń jaýapkershiligin arttyrý, otbasy qundylyqtaryn keńinen nasıhattaý, qazaqstandyq otbasynyń jaǵymdy ımıdjin úgitteý. Baıqaýǵa eńbekte, sportta, shyǵarmashylyqta, zııatkerlik salada, ǵylymda nemese ózge de salalarda joǵary jetistikterge jetken ónegeli otbasylar qatysa alady.
Bıyl jetinshi ret uıymdastyrylǵan saıystyń qatysýshylary jyl ótken saıyn artyp keledi. 2014 jyldan beri konkýrsqa qatysýǵa 1500-nan astam januıa ótinim bergen. Bıyl qyzylordalyq 182 otbasy baıqaýda baǵyn synady.
Búginde oblysta 141 myńnan asa otbasy, 5 myńǵa jýyq «Altyn alqa», 10 myńnan asa «Kúmis alqa» ıegeri bar.
Eske sala ketsek, budan buryn Qyzylordada respýblıkalyq jyrshy-jyraýlar baıqaýy ótkiziletindigin habarlaǵan bolatynbyz.
