«Mereıli otbasy»: Qostanaıda belgili dıqanshynyń otbasy jeńimpaz atandy
Aýdandar men qalalarda ótken «Mereıli otbasy» baıqaýlarynda úzdik shyqqandar oblystyq kezeńde baqtaryn synasty. Úzdik shyqqandardy oblys ákiminiń orynbasary Marat Júndibaev quttyqtap, syı-qurmet kórsetti.
«Bıyl altynshy márte uıymdastyrylǵan baıqaýdyń túrli deńgeılerinde Qostanaı oblysynan 600-den asa otbasy qatysqan. Qoǵamda jaqsy qasıettiń barlyǵy da otbasynda qalyptasady. «Mereıli otbasy» baıqaýynda osyǵan deıingi jeńimpaz bolǵan otbasylar kópke úlgi jáne ulttyq baılyǵymyz sanalady. Bıyl otbasy qundylyqtaryn nasıhattaý maqsatynda «Nur Otan» partııasy «Baqytty otbasy» jobasyn qolǵa aldy. Qazir osy joba boıynsha óńirimizde 28 kópbalaly otbasy turǵyn úımen qamtamasyz etildi. 14 otbasynyń páterine kúrdeli jóndeý júrgizildi. 200-ge jýyq otbasyna materıaldyq kómek kórsetildi», - dedi Marat Júndibaev.
Baıqaýdy uıymdastyrýshylar alqasynyń uıǵarymymen qatysýshylar «Ónegeli otbasy», «Parasatty otbasy», «Mereıli otbasy» atalymdary boıynsha toptastyrylǵan. «Ónegeli otbasy» atalymynyń jeńimpazy - jankeldındik Málik Baımaǵambetovtiń otbasy. «Parasatty otbasy» atalymy boıynsha 150 myń teńgeniń sertıfıkaty Aıtjan men Erbolat Kishkentaevtar otbasyna berildi. Aıtjan - ózin-ózi taný pániniń muǵalimi. Al Erbolat Kishkentaev shırek ǵasyrǵa jýyq quqyq qorǵaý salasynda eńbek etti. Osydan bir jarym jyl buryn ata-ana qamqorlyǵynan aıyrylǵan 3 balany baýyryna basqan.
Al «Mereıli otbasy» júldesine Fedorov aýdanynda turatyn Býblıkter otbasy laıyq dep tanyldy. Fedorov aýdanynyń qurmetti azamaty Vasılıı Býblık jastaıynan eńbekke aralasqan. Bilikti dıqan dándi daqyldardyń joǵary sapaly egin, jer óńdeýge jetý, jańa óndiris tehnologııalar men ylǵal resýrs únemdeıtin tehnıkany qoldana otyryp, joǵary egin jınaýda úzdik kórsetkish kórsetti. Jyl saıyn Fedorov aýylynyń áleýmettik salasyn damytýǵa jáne abattandyrýǵa, qaıyrymdylyq sharalaryna belsene aralasady. Býblıkter otbasyna oblys ákiminiń orynbasary Marat Júndibaev 300 myń teńgeniń sertıfıkatyn tabys etti.
Endi Býblıkter otbasy osy ulttyq baıqaýdyń respýblıkalyq kezeńinde oblys namysyn qorǵaıdy.
