«Mereıli otbasy» konkýrsynyń ulttyq kezeńine qatysatyn 17 otbasy anyqtaldy
NUR-SULTAN. QazAqparat - Búgin Nur-Sultanda QR Premer-Mınıstriniń orynbasary Gúlshara Ábdiqalyqovanyń tóraǵalyǵymen «Mereıli otbasy» ulttyq konkýrsynyń laýreaty ataǵyn berý jónindegi komıssııanyń otyrysy ótti, dep habarlaıdy QazAqparat.
Otyrysty ashqan Gúlshara Ábdiqalyqova Tuńǵysh Prezıdent - Elbasy N.Á.Nazarbaevtyń: «Otbasy - bul óz halqyna, onyń mádenıeti men turmysyna degen mahabbattyń sarqylmas kózi. Bul otanshyldyq jáne ata-analardyń, balalar men nemerelerdiń baqyty arqyly otanymyzdyń gúldenýine máńgilik qamqorlyq» degen sózderin aıtyp ótti.
Baıqaý jeńimpazdaryn anyqtaý barysynda otbasy músheleriniń jetistikteri men olardyń mańyzdylyǵy, úlkenderge degen qurmet pen súıispenshilikke negizdelgen rýhanı-adamgershilik qundylyqtaryn saqtap, urpaqtan-urpaqqa jalǵastyrý basty ustanym boldy.
Konkýrs úsh kezeń - aýdandyq, óńirlik jáne ulttyq kezeń boıynsha ótedi.
Gúlshara Ábdiqalyqova konkýrsqa qatysýshylardyń sany jyl saıyn artyp kele jatqanyn atap ótti. Bıyl oǵan 3 204 otbasy qatysqan, bul 2014 jylmen salystyrǵanda 2,5 ese kóp.
Osy jyldar ishinde Konkýrsqa 15 197 otbasy, onyń ishinde 9 407 otbasy (62%) aýyldan qatysty. Konkýrstyń barlyq qatysýshylarynyń 36,3% - kópbalaly otbasylar, 18% - jas otbasylar, 17% - bir mamandyq eńbekkerleri áýletteriniń ókilderi.
Bıylǵy mamyr aıynda barlyq oblystarda jáne respýblıkalyq mańyzy bar qalalarda aımaqtyq kezeń jeńimpazdaryn marapattaýǵa arnalǵan is-sharalar men saltanatty rásimder ótkizildi, sondaı-aq ár óńirden aqyrǵy kezeńge qatysatyn 2 otbasy belgili boldy.
Komıssııa músheleri Konkýrstyń ulttyq kezeńine qatysatyn 17 úmitkerdi anyqtady.
Qazaqstandyqtar «Mereıli otbasy» konkýrsynyń aqyrǵy kezeńinde jeńimpazdy anyqtaýǵa kaztube.kz saıty jáne SMS-habarlamalarmen daýys berý arqyly qatysa alady.
Daýys berý qorytyndysy qyrkúıektiń ekinshi jeksenbisinde merekelenetin Otbasy kúni qarsańynda shyǵarylady.
