«Mereıli Otbasy» baıqaýynyń júldegeri Esqojınder otbasy bıyl 48-shi úılený toıyn ótkizedi
ASTANA. QazAqparat - «Mereıli Otbasy» baıqaýynyń arqasynda elimizde úlgili otasylardyń sany artty. Bul týraly búgin atalǵan ulttyq baıqaýdyń jeńimpazdaryn marapattaýǵa arnalǵan sharada agenttik tilshisine Almaty oblysy boıynsha úzdik tanylǵan otbasynyń otaǵasy Ánýarbek Esqojın aıtty.
«Barlyǵy jaqsy ári ádil ótti. Biz jańa «Nıva» kóligine ıelendik jáne osy syılyqqa alǵysymdy aıtamyn. Áıelim ekeýimiz 1998 jyldan beri jetim jáne ata-ananyń qamqorlyǵynsyz qalǵan 340 balany tárbıeledik. Osy 16 jylda bizdiń otbasymyzdaǵy 48-shi úılený toıy Talǵarda ótedi»,-dedi Á. Esqojın.
Ol Qazaqstan boıynsha ıgi sharaǵa bastamashy bolǵan Prezıdent Nursultan Nazarbaevqa alǵysyn bildirdi.
«Mereıli Otbasy» baıqaýynyń arqasynda bizdiń Otanymyzda úlgili jáne baqytty otbasylar sany arta tústi»,-dedi otaǵasy.
Á. Esqojınniń zaıyby Tuıaq Esqojına Talǵar aýdanynyń Qurmetti azamatshasy, Qazaqstannyń isker áıelder respýblıkalyq baıqaýyndaǵy «Parasattylyq pen meıirimdilik» atalymynyń jeńimpazy. Ótken jyly Elbasynyń usynysymen Ulttyq qordan «Altyn júrek» nagradasymen, «Jetim balalarǵa kórsetken qamqorlyǵy úshin» atalymymen marapattaldy.
