«Mereıli otbasy» baıqaýynyń jeńimpazy 19 qyrkúıekte anyqtalady

ASTANA. QazAqparat - «Mereıli otbasy» baıqaýynyń jeńimpazy 19 qyrkúıekte anyqtalady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Ortalyq saılaý komıssııasynyń múshesi Lázzat Súleımen aıtty.

«Mereıli otbasy» baıqaýyna 16 aımaqtan 1298 otbasy qatysty. Aımaq jeńimpazdary búginde Astanaǵa keldi. Halyqtyń ınternet arqyly daýys berýiniń nátıjesinde 19 qyrkúıek kúni baıqaý jeńimpazy anyqtalady», - dedi ol.

Onyń sózine qaraǵanda, bul baıqaý otbasynyń bedelin arttyrýǵa, qoǵamnyń rýhanı jańarýyna, memlekettiń odan ary nyǵaıýyna yqpal etetin bolady.

«Shyn máninde Qazaqstanda ónegeli otbasylar óte kóp. Basym bóligi óz tirshiligimen aınalysyp, bala-shaǵasyn ósirip otyr. Al olardy halyqqa tanytý, nasıhattaý arqyly jastarǵa tálim-tárbıe, jas otbasylarǵa ónege kórsetý qajet», - dedi L.Súleımen.