«Mereıli otbasy» baıqaýynyń fınaly ótedi

NUR-SULTAN. QazAqparat – Bıyl «Mereıli otbasy» ulttyq konkýrsyna 3204 otbasy qatysady, dep habarlaıdy QazAqparat tilshisi.

Alty jylda atalmysh konkýrsqa 15 197 otbasy qatysypty. Onyń 62 paıyzyn - aýyl januıalary, 3 paıyzyn - kópbalaly otbasylar, 18 paıyzyn - jas oshaqtar, 17 paıyzyn - eńbek dınastııalary quraǵan. Konkýrsqa qatysýshylardyń sany jyl ótken saıyn ósýde.
QR Mádenıet jáne sport vıtse-mınıstri Eldos Ramazanov bıyl qatysatyn 17 otbasynyń árqaısy erekshe ekenin aıtty.
«Óńirlik konkýrstardan úzdik shyqqan otbasylardyń jartysynan astamy - kópbalaly. Mysaly, astanamyzdyń namysyn aqyndar otbasy qorǵaıdy. Otaǵasy Serikzat Dúısenǵazy besinshi atadan jalǵasqan aqyndyq joldy ustanǵan. Belgili qalamger Serǵazy Rahymov pen «Sábı bolǵym keledi» ániniń sazyn jazǵan Tursynǵazy Rahymov Dúısenǵazınder áýletine týys bolyp keledi. Serikzat aqyn jubaıymen birge 3 bala tárbıelep otyr», - deıdi mınıstrlik ókili.
QR Jastar jáne otbasy isteri komıtetiniń tóraǵasy Madııar Qojahmet «Mereıli otbasy» konkýrsynyń otbasylyq qundylyqtar quldyrap turǵan zamanda mańyzy zor ekenin aıtady.
«Jyl basynan beri 59 555 neke qıylsa, 29 025 ajyrasý faktisi tirkelgen. Ajyrasýǵa minezdiń sáıkes kelmeýi, baspana qıyndyǵy, zorlyq-zombylyq, maskúnemdik pen oıynqumarlyq sebep bolýda. Bul tendentsııanyń betin qaıtarý úshin 9 óńirde otbasyn qoldaý ortalyǵy ashyldy», - deıdi ol.
Al QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen konkýrs alty jyldyń ishinde bıik bedelge ıe bolǵanyn aıtady.
«Bıylǵy qatysýshylardyń 80 paıyzy - kópbalaly ári ónegeli otbasylar. «Otan otbasynan bastalady» degen qanatty sóz bar. Memleket basshysy Qasym-Jomart Toqaevtyń Qazaqstan halqyna Joldaýynda otbasy jáne bala ınstıtýtyn qoldap, ınklıýzıvti qoǵam qurýdy basym baǵyt retinde atady. Sonymen qatar, Prezıdent eń aldymen kópbalaly jáne az qamtylǵan otbasylar úshin otbasylyq bıznes ashý máselesi boıynsha úkimetke naqty tapsyrmalar berdi. Osynyń bári Memleket basshysynyń otbasy ınstıtýtyna degen qamqorlyǵy», - dedi ol.
Erteń - konkýrs úmitkerlerine daýys berýdiń sońǵy kúni. Al onyń qorytyndysy 7 qyrkúıek kúni jarııalanbaq.