Mereıli otbasy: Astananyń eń úlgili januıalary anyqtaldy
Elordalyq qatysýshylar arasynda birligi jarasqan, aınalasyna syıly dárigerler, ustazdar, ónerpazdar, sportshylar, áskerıler jáne kásipkerler otbasy baq synady. Ulttyq konkýrsty ótkizý boıynsha arnaıy komıssııa otyrysynda jeńimpazdar anyqtaldy.
Daýys berý nátıjesine sáıkes, «Mereıli otbasy» ulttyq baıqaýy Astana qalalyq kezeńiniń júldeli úshinshi oryny Óteýilovter men Úderbaevtar otbasyna berildi. Nurken Óteýilov pen onyń jary Aınur Bolatqyzy - respýblıkaǵa tanymal ártister. Olardyń qos uly da kıno salasyna atsalysyp keledi, kishi uly Aqarys kınoteatrlarda kórsetiletin kóptegen mýltfılmderge dýblıaj jasap úlgerdi. Jeńimpazdarǵa alǵys hat men kásibı fotosýretteri jınaqtalǵan dısk jáne 100 myń teńgelik sertıfıkat tabys etildi.
Ekinshi oryndy ustazdyqty tý etken Smaılovtar men kóp balaly Aıtqalıevter otbasy jeńip aldy. Olarǵa alǵys hattar men 200 myń teńgelik sertıfıkatty Astana qalalyq Qoǵamdyq keńesiniń jáne Ardagerler keńesiniń tóraǵasy Sansyzbaı Esilov tabystady. Sansyzbaı Seıitjanuly osydan 20 jyl burynǵy Astanadaǵy kúnderdi eske aldy.
«Bul óte mańyzdy úlken shara. «Mereıli otbasy» baıqaýy alǵash uıymdastyrylǵanda alǵashqy jeńimpaz otbasylar tań qalatyn edi. Endi mine, dástúrge aınalyp, jyldaǵy merekege aınaldy. Osydan 20 jyl buryn Á. Jaqsybekov Astana qalasynyń ákim bolyp turǵan kezde eki ret Elbasynyń aldynda qalanyń damýy jóninde esep beretinbiz. Shamamen kóktemde biraz sógis estip, basymyz tómen tústi, kóńil-kúıimiz joq. Sonda Elbasy bizge qarap: «Jigitter, sender nege muńaıyp qaldyńdar? Astanany salamyz, eshqaıda ketpeımiz. Biraq, eń basty mindet - Astananyń turǵyndaryn tárbıelep, birtutas el bolý dedi. Búgingi shara da sol ıdeıaǵa baǵyttalǵan», - dedi Sansyzbaı Esilov saltanatty marapattaýda.
Sondaı-aq, qalalyq baıqaýda dárigerler men áskerıler otbasy top jaryp, respýblıkalyq «Mereıli otbasy» baıqaýyna joldama aldy.
Asyljan Erekeshov - Keńes odaǵynyń jáne Táýelsiz Qazaqstannyń bilikti dárigeri Ábýbákir Erekeshevtiń uly, Astanadaǵy №1 Perınataldyq ortalyqtyń hırýrgi bolyp qyzmet etedi. Ol jubaıy Manıra Erekeshevamen Almatydaǵy medıtsınalyq ýnıversıtet qabyrǵasynda tanysyp, shaqyraq kótergen. Olardyń úlken uly Aıan búginde ata-anasynyń izin jalǵap, S. Asfendııarov atyndaǵy Qazaq ulttyq medıtsına ýnıversıtetinde bilim alyp jatyr.
Taǵy bir jeńimpaz otbasy, 4 balany ósirip otyrǵan Ǵanı jáne Ásel Baýberikovter áskerı mamandar. Otbasynda úshinshi bala týǵan soń, serjant Ásel Baýberikova áskerı qyzmetti toqtatyp, balalar tárbıesine kóńil bólýdi uıǵarǵan.
«Bizdiń úıde temirdeı tártip ornaǵan jáne bilimge basa mán beriledi. Keshki as ýaqytynda balalar sabaǵy, úıirmedegi jetistikteri boıynsha «esep beredi». Túsinbegen taqyryptary bolsa, úı-ishi bolyp talqylap, sheshimin tabamyz. Ǵanı Máskeýde úsh jyl bilim aldy jáne bul jyldary balalar Máskeý mektepterinde úzdik nátıje kórsetip, «Reseı bilgishteri» baıqaýynda top jardy. Qazir de túrli jetistikterimen qýantyp keledi», - deıdi Ásel.
Aıta keteıik, dástúrge aınalǵan «Mereıli otbasy» ulttyq baıqaýy Memleket basshysynyń usynysymen 2014 jyldan beri ótkizilip keledi.
