Mereıli otbasy: Ár shańyraqtyń birligi - túptep kelgende el baılyǵy
KÓKShETAÝ. QazAqparat - Otbasy baqyty – berekede. Búgingi tańda Aqmola oblysy Aqkól aýdanynyń Amangeldi aýylyndaǵy Áýbákirovter otbasyn dál osylaı sýretteýge bolady. Jalpy ustazdyq ótili 215 jyldy quraıtyn bul otbasynyń kópke úlgi bolarlyqtaı óz tarıhy, salt-dástúri, ádet-ǵurpy bar, dep habarlaıdy QazAqparat tilshisi.
Shańyraqtaǵy shattyq, sútteı uıyǵan yntymaq-birligimen, tamasha tirligimen talaıǵa úlgi bola bilgen bul otbasynyń otaǵasy Aqan Qaıyrjanuly men otanasy Qýanysh Shotanqyzy - 5 balaǵa ónegeli tárbıe berip, 9 nemereniń ulaǵatty ata-ájesi atanyp otyrǵan baqytty jandar.
Otaǵasy 45 jyl boıy taban aýdarmastan bilim salasynda qyzmet etken. 30 jyl Amangeldi aýylyndaǵy mektepte dırektor bolyp qyzmet atqarypty. Kóp shákirti ustazynyń jolyn qýyp, mektep dırektory bolyp qyzmet isteýde. Al óziniń balalaryna keletin bolsaq, tuńǵyshy Beıbit - jeke kásipker, qurmetti advokat, kenje uly Naýannyń muǵalimdik ótili – 22 jyl.
Qyzy Nazgúl otyz jyldan beri orys tili men ádebıeti páninen sabaq berip keledi. Merýertiniń pedagogıkalyq eńbek ótili - 25 jyl, Stepnogor qalasyndaǵy №9 qazaq orta mektebinde oqý isiniń meńgerýshisi.
Ótken jyly jyly atalmysh otbasy «Mereıli otbasy» ulttyq baıqaýynyń oblystyq kezeńinde úzdik atanyp, oblys ákiminiń 250 myń teńge sertıfıkatyna ıe bolǵan edi.
Otanasy Qýanysh Shotanqyzy aıtýynsha, halqymyzdyń ósýiniń, órkendeýiniń kepili kóbine-kóp otbasylyq yntymaq pen tatýlyqta jatyr.
«Ár otbasynyń birligi - túptep kelgende el baılyǵy. Al, otbasynyń baılyǵy, altyn dińgegi - ómirdiń parqyn tereń túsinetin, urpaǵyn ana tiline, qazaqtyń baýyrmaldyǵy men qonaqjaılyǵyna, qaıyrymdylyqqa baýlıtyn ata-áje. Olar bala úshin - asqar taý, orny erekshe tálim-tárbıe mektebi», - deıdi Qýanysh Shotanqyzy.
«Ustazdyq etken jalyqpas, úıretýden balaǵa» degendeı, bar ǵumyryn urpaq tárbıesine arnap, bilim salasyna eleýli úles qosyp kele jatqan Áýbákirovter otbasyna Halyqaralyq otbasy kúni bizde baqyt, bereke tileımiz.
