«Mereıli otbasy»: 104 jastaǵy qarııanyń otbasy bas júldeni jeńip aldy
Aqtóbe qalasy boıynsha barlyǵy 22 otbasy baıqaýǵa qatysýǵa ótinish birdirgen. Biraq 11 otbasy irikteýden ótip, ІІІ-oryndy Ábildaevtar, ІІ-oryndy Omarovtar, І-oryndy Qartbaevtar jáne bas júldeni Bısenǵalıevter otbasy jeńip aldy.
«Qazirgi zaman - jumaq. Biz traktor aıdap, jer jyrttyq, mal baǵyp, sıyr saýyp kún kórdik. Kúıeýim Ǵabıt Ekinshi dúnıejúzilik soǵysqa ketti, keıin Japon soǵysyna qatysty. Ózim de áke-shesheden jalǵyz edim, maıdanǵa ketken joldasymdy kúttim. Eki ret jaralanyp, elge oraldy. Bir ul, bir qyzym bar. Nemere, shóbere kórip otyrmyn. Uzaq jasaýdyń syry - eńbekte. Qazir is tigemin, qımylsyz otyrmaımyn. Al otbasyn saqtap qalý ene men kelinge baılanysty. Jastar bilmegenin úırenip, qateligin túzep otyrýy kerek. Eneleri úıretýden jalyqpaǵany jón, kelindi qyzyndaı kórgen durys. Ózim kelinderime qyzym deımin», - deıdi keıýana Jaqybaı Bısenǵalıeva. 
Kelini Ýázıpa Bısenǵalıeva ájeniń óte sabyrly, sharshaýdy bilmeıtin qýatty ekenin aıtyp berdi.
«Óziniń 5 synyptyq bilimi bar. Keıin soǵys bastaldy, aýyr jumys istedi. Sonda da kitaptan qol úzgen emes. Teledıdar da qaraıdy. Іsmer, qonaqqa barǵandy, qonaq kútkendi unatady. Este saqtaý qabileti jaqsy. Adamdarmen emen-jarqyn sóılesedi, ashyq», - deıdi kelini.
Marapattaý kezinde qala ákimi Іlııas Ispanov bas júldege 150 myń teńgeniń sertıfıkaty men estelik syılyq berdi. Endi jeńimpaz «Mereıli otbasy» baıqaýynyń oblystyń kezeńine qatysady.
«Buǵan deıin Nusqabaevtar otbasy respýblıkalyq kezeńde bas júlde aldy, keıin Dımashtyń ata-anasy Qudaıbergenovter arnaıy syılyqty ıelendi. Osy jolmen jeńis jalǵasatynyna senim bar», - dedi qala ákimi Іlııas Ispanov.
