Mereıli otbasy: BQO-daǵy baıqaýda 88 jastaǵy aqsaqaldyń áýleti jeńimpaz atandy
ORAL. KAZINFORM — Oral qalasyndaǵy Saltanat saraıynda «Mereıli otbasy-2025» ulttyq baıqaýynyń oblystyq kezeńi qorytyndylandy.
Saltanatty is-sharaǵa qatysqan oblys ákiminiń orynbasary Qaıyrjan Meńdiǵalıev atalmysh baıqaýdyń Ata zańymyzdyń 30 jyldyǵy qarsańynda jáne Memleket basshysy jarııalaǵan Jumysshy mamandyqtar jyly aıasynda ótip jatqandyǵyn málim etti.
Prezıdent janyndaǵy áıelder jáne otbasylyq-demografııalyq jónindegi ulttyq komıssııanyń bastamasymen jyl saıyn uıymdastyrylyp otyrǵan dástúrli baıqaýǵa oblys boıynsha bıyl 100-den astam ótinim tústi. Sonyń ishinde Oral qalasy men 12 aýdannan oza shapqan ónegeli 21 otbasy qatysyp, baq synady.
Qatysýshylardy óńir basshysy Narıman Tóreǵalıevtiń atynan quttyqtaǵan Qaıyrjan Ermekuly otbasy ınstıtýty memlekettiń udaıy nazarynda ekendigin jetkizdi.
— Memleket basshysy Qasym-Jomart Kemeluly Toqaev «Árbir adam úshin ushqan uıasynyń orny bólek. Óskeleń urpaqtyń otbasynda tálim-tárbıe alyp, ulttyq qundylyqtardy boıyna sińirýi óte mańyzdy. Salt-dástúrge qurmet te, týǵan elge súıispenshilik te qasıetti qara shańyraqtan bastaý alady. Otbasy ınstıtýty eńbekqorlyq, bilimpazdyq, tilektestik syndy „Adal azamatqa“ tán qasıetterdi qoǵamda jan-jaqty dáripteý arqyly ulttyń jańa sapasyn qalyptastyrýǵa ólsheýsiz úles qosady», — dep otbasynyń qoǵamdyq jáne memlekettik rólin atap ótti. Qazirgi tańda Batys Qazaqstan oblysy boıynsha 14 myńnan astam kópbalaly ana bar, onyń arasynda «Altyn alqa», «Kúmis alqa», «Batyr ana» ıegerleri — 6 558 adam. Jyl saıyn Otbasy kúni, byltyrdan bastap Áke kúni, Ana kúni atalyp ótilýde. Osynyn bári — memleket tarapynan ulttyq otbasy ınstıtýtyn saqtaýǵa baǵyttalǵan saıasattyń aıqyn kórinisi, — dedi Q.Meńdiǵalıev.
Budan keıin «Mereıli otbasy-2025» ulttyq baıqaýy oblystyq kezeńiniń jeńimpaz-júldegerleri marapattaldy.
Bórli aýdanynan kelgen Súıinǵaraevtar otbasy birinshi orynǵa ıe bolyp, olarǵa 1 mln teńgeniń sertıfıkaty tabys etildi. Oǵan qosa atalǵan otbasy respýblıkalyq kezeńge joldama aldy.
Qaratóbelik Qurmanǵalıevter otbasy ekinshi (500 myń teńge), shyńǵyrlaýlyq Kasetovter otbasy úshinshi (300 myń teńge) orynnan kórindi.
Sondaı-aq báıterektik Sultanǵalıevter — «Qaıyrymdy otbasy», oraldyq Dosqalıevter — «Qolónershiler otbasy», qaratóbelik Tasqalıevter — «Jumysshy otbasy — eńbek adamy», shyńǵyrlaýlyq Kýjıevter «Eńbek dınastııasy — temirjolshylar» atalymymen erekshelendi. Al terektilik Tuıaqovtarǵa — «Kreatıvti otbasy», bókeıordalyq Orazǵulovtarǵa –«Ónerli otbasy», jańaqalalyq Bısenǵalıevter — «Áke isin jalǵastyrǵan otbasy», tasqalalyq Erikbaevtarǵa «Dástúr jalǵastyrǵan otbasy» atalymy berildi.
Baıqaýda belsendilik tanytqan basqa otbasylar alǵyshattarmen marapattaldy.
Jeńimpaz atanǵan Súıinǵaraevtar otbasyn 88 jastaǵy aqsaqal Muratbaı Yqylasuly bastap keldi.
— Osynshama jasqa kelgende, mereıimizdi asyrǵan is-shara boldy. Biz 10 bala tárbıelep ósirdik, 20 nemere-jıen, 20 shóberemiz bar. Erjetkenderiniń báriniń joǵary bilimi bar, tipti keıbireýleri qos mamandyqty meńgergen. Qazaqstandaǵy mıllıondaǵan otbasynyń birimiz. Meniń aıtarym, jastar keshirimdi bolýy kerek. Biriniń aıtqanyn ekinshisi tyńdaýy qajet. «Eki qoshqardyń basy bir qazanǵa syımaıdy» degen, eger tatýlyq ornamasa, ol otbasy uzaqqa barmaıdy. Otbasy baqytty bolsa, el de baqytty bolady. Elimizdiń bereke-birligi arta bersin, — dedi Muratbaı qarııa.
Tasqala aýdanynan kelgen Dúısenovter otbasynyń ókili Artýr Serikbaıuly mundaı baıqaýlardyń otbasy qundylyǵyn dáripteýde mańyzy zor ekendigin jetkizdi.
— Bizdiń áýlet ókilderiniń kópshiligi bilim salasynda qyzmet atqarady. Sondaı-aq birqatary memlekettik qyzmet, munaı-gaz salasynda jumys isteıdi. Ákemiz ómirden erterek ketti. Anamyz Ǵalııa — jeti balanyń anasy, 16 nemeresi bar, qazir shóberesiniń alaqanynan sý iship otyr. «Áke kórgen oq jonar, sheshe kórgen ton pisher» degen osyndaı analarymyz barda bizdiń shańyraǵymyzdyń irgesi berik bolatyny anyq, — dedi A.Dúısenov.
Eske sala keteıik, budan buryn Oralda aqyn Ǵumar Qarashtyń 150 jyldyǵyna arnalǵan músháıra máresine jetkenin jazǵan edik.