«Mereıli otbasy — 2025»: Astanada elimizdiń 20 úlgili otbasy marapattaldy
ASTANA. KAZINFORM — Astanada Respýblıka kúni qarsańynda «Mereıli otbasy» ulttyq baıqaýynyń jeńimpazdaryn marapattaý rásimi ótti, dep habarlaıdy Mádenıet jáne aqparat mınıstrliginiń baspasóz qyzmeti.
Baıqaýǵa elimizdiń barlyq aımaǵynan kelgen óńirlik kezeńderdiń jeńimpazdary qatysty. Olar — kópshilikke úlgi kópbalaly, eńbek adamdary jáne shyǵarmashyl otbasylar. Іs-sharaǵa Senat Tóraǵasy Máýlen Áshimbaev, QR Mádenıet jáne aqparat mınıstri Aıda Balaeva, QR Parlamenti depýtattary, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, qoǵamdyq uıymdardyń basshylary qatysty. Máýlen Áshimbaev óz sózinde Memleket basshysynyń tapsyrmasy boıynsha qazaqstandyq otbasylardy qoldaýǵa baǵyttalǵan aýqymdy jumys júrgizilip jatqanyn atap ótti. Azamattardyń áleýmettik jaǵdaıy jaqsaryp, ana men balany qorǵaýǵa erekshe kóńil bólingenin de sóz etti.
— Prezıdentimiz bıylǵy Joldaýynda da azamattarymyzdyń ál-aýqatyn arttyrýǵa arnalǵan mańyzdy mindetter júktedi. Munyń bári elimizdegi ár otbasynyń ómirine oń yqpal etýdi jáne azamattardyń ómir súrý sapasyn jaqsartýdy kózdeıdi. Sonymen qatar keıingi jyldarda bul salada keshendi bastamalar tabysty qolǵa alynǵanyn da atap ótken jón. Naqty aıtqanda, «Ulttyq qor — balalarǵa» baǵdarlamasy iske qosyldy. Jas býynnyń sapaly bilim alýyn qamtamasyz etý maqsatymen «Keleshek mektepteri» sııaqty jobalar júzege asyrylýda. Bilim berý protsesine tsıfrlyq tehnologııany engizýge arnalǵan irgeli isterdiń de máni zor. Sonymen qatar, ana men bala densaýlyǵyn saqtaý, olardyń quqyǵyn qorǵaý basty nazarda. Balaly otbasylardy qoldaý sharalary nyǵaıyp, sábı kútimi úshin ótemaqy tóleý merzimi de uzartyldy, — dedi Senat Tóraǵasy.
«Mereıli otbasy» ulttyq baıqaýy — rýhanı jáne otbasylyq qundylyqtar men otbasy ınstıtýtyn nyǵaıtý maqsatynda 2014 jyly bastaý alǵan biregeı joba. Osy jyldar ishinde baıqaýǵa 20 myńnan astam qazaqstandyq otbasy qatysty. Bıyl baıqaý on ekinshi ret ótkizilip otyr. Oǵan elimizdiń barlyq óńirinen 3434 ótinim túsken. Ár óńir boıynsha jeńimpaz anyqtalyp, barlyǵy 20 otbasy marapattaldy. Olarǵa estelik músinsheler, dıplomdar men 1 mıllıon teńge kóleminde aqshalaı sertıfıkattar tabystaldy.
Bıylǵy baıqaýdyń jeńimpazdary:
- Aıtqojınder otbasy — Astana
- Dúısebaevtar otbasy — Almaty
- Nurtaevtar otbasy — Shymkent
- Mekebaevtar otbasy — Aqmola oblysy
- Tóremuratovtar otbasy — Aqtóbe oblysy
- Bekdaıyrlar otbasy — Almaty oblysy
- Útepovtar otbasy — Atyraý oblysy
- Jaqypovtar otbasy — Shyǵys Qazaqstan oblysy
- Bektasovtar otbasy — Jambyl oblysy
- Sýıýńgaraevtar otbasy — Batys Qazaqstan oblysy
- Klıýchnıkovter otbasy — Qaraǵandy oblysy
- Egamberdıevter otbasy — Qostanaı oblysy
- Absadıuly otbasy — Qyzylorda oblysy
- Sholtamanovtar otbasy — Mańǵystaý oblysy
- Úzbekovtar otbasy — Soltústik Qazaqstan oblysy
- Tursynbaevtar otbasy — Pavlodar oblysy
- Moldabekovtar otbasy — Túrkistan oblysy
- Sydyqbaevtar otbasy — Abaı oblysy
- Bektenovtar otbasy — Jetisý oblysy
- Qapbasovtar otbasy — Ulytaý oblysy
Budan buryn kópbalaly otbasylar men marapattalǵan analar 449 mlrd teńge járdemaqy alǵanyn jazǵanbyz.