Mereı Bazarbaev álem chempıonatynda altyn medal jeńip aldy
ASTANA. KAZINFORM — Erkin kúresten Qazaqstan quramasynyń ókili Mereı Bazarbaev AQSh-tyń Las-Vegas qalasynda ótip jatqan 23 jasqa deıingi balýandar arasyndaǵy álem chempıonatynda altyn medal jeńip aldy, dep habarlaıdy Ulttyq olımpıadalyq komıtet.
Otandasymyz 57 kelige deıingi salmaqta úzdik atandy. Fınalda ol túrkııalyq Bekır Keserden basym tústi.
Mereı Bazarbaev fınalǵa deıin jastar arasynda álem chempıonatynyń jeńimpazy, amerıkalyq Lıýk Lılledaldy 3:1 esebimen, frantsııalyq Rasýl Galbýraevty 13:2 esebimen jeńdi. Al jartylaı fınalda japonııalyq Daıto Katsýmeden 7:0 esebimen basym tústi.
Aıta keteıik, buǵan deıin qazaqstandyq balýan Shuǵyla Ómirbek U23 álem chempıonatynda ýkraınalyq qarsylasyn 11:10 esebimen jeńip, qola júldeger atanǵan bolatyn. Bul — Qazaqstan áıelder kúresi tarıhyndaǵy osy chempıonattyń alǵashqy medali.
