Mereı Aqshalov sport jolyn tańdaǵan jastardy adal bolýǵa shaqyrdy
NUR-SULTAN. QazAqparat – Belgili qazaqstandyq boksshy Mereı Aqshalov dopıngpen ustalǵan sportshylardyń jazasyn kúsheıtý boıynsha Prezıdent qol qoıǵan zańǵa qatysty pikir bildirip, sportty tańdaǵan jastardy adal bolýǵa shaqyrdy, dep habarlaıdy QazAqparat tilshisi.
«Bul zańdy tolyǵymen qoldaımyn. Durys qadam dep sanaımyn. Sportshy ár ýaqytta da taza ári adal bolýy kerek. Paıymdap qarasańyz, bir sportshy dopıng qabyldap, altyn medal alsa, shynaıy chempıondy taǵynan, juldyzdy sátinen aıyrady. Al basqa sportshy adal júrgenimen, ótiriktiń qurbany bolady. ıAǵnı, adaldyqty attap ketken sportshy basqa bireýdiń jolyn kesedi», - deıdi Mereı Aqshalov QazAqparat tilshisine.
Boksshynyń aıtýynsha, dopıng qabyldaǵan sportshyny búkil basymdyqtan aıyryp, syıaqyny qaıtaryp alý da – ádiletti sheshim.
«Júldeni aldap alsa, ony el nege marapattalýy kerek? Bilýimshe, sportshymen birge bapkerin de, dárigerin de jazalaǵaly jatyr. Qazir sportshylar onlaın-kýrstardan ótip, sertıfıkat alady. Olarǵa qandaı vıtamındi qabyldap, qandaıyn qabyldamaý kerektigi jiti túsindiriledi. Bul saladaǵy mamandar barshylyq. Daıyndyq barysynda sportshy olardyń bárimen tyǵyz baılanysta bolyp, belgili bir dárini paıdalanarda asa saq bolýy kerek», - deıdi Mereı Aqshalov.
Aıta ketsek, Mereı Aqshalov 2013 jyly bokstan Azııa chempıony atanyp, artynsha Álem chempıony ataǵyna da qol jetkizgen boksshy. Sonymen qatar, ol «Astana arlandary» boks klýbynyń birneshe maýsymynda el namysyn qorǵaǵan.
Eske sala ketsek, Prezıdent Qasym-Jomart Toqaev «QR Sport jáne dene shynyqtyrý týraly keıbir zańnamalyq aktilerge ózgertýler men tolyqtyrýlar engizý týraly» zańǵa qol qoıǵan bolatyn. Zań dopıngige qarsy erejelerdi buzǵandardyń jaýapkershiligin qatańdatýǵa, Ulttyq dopıngke qarsy uıymnyń mártebesin kúsheıtýge baǵyttalǵan.
