Merekelik jeńildik: 600-den astam saýda nysany Republic Day jáne Bereke Fest aktsııalaryna qosyldy
ASTANA. KAZINFORM - Qazaqstanda Respýblıka kúni qarsańynda Republic Day jáne Bereke Fest aktsııalaryn qamtıtyn jalpyulttyq merekelik jeńildikter naýqany bastaldy. Oǵan 17 qazannan elimiz boıynsha 649 saýda nysany qosyldy. Republic Day aktsııasy iri saýda oıyn-saýyq ortalyqtary men saýda keshenderinde ótse, Bereke Fest saýda jelilerin qamtıdy.
QR Saýda jáne ıntegratsııa mınıstrligi baspasóz qyzmetiniń habarlaýynsha, tutynýshylar úshin azyq-túlik jáne azyq-túlikke jatpaıtyn taýarlarǵa arnaıy baǵalar qoıylǵan. Merekelik usynystar 27 qazanǵa (qosa alǵanda) deıin jalǵasady. Taýarlardyń jekelegen sanattaryna 50%-ǵa deıin jeńildik qarastyrylǵan. Jalpy jeńildik mólsheri taýar assortımenti men aktsııaǵa qatysýshy saýda uıymdarynyń sharttaryna baılanysty.
Republic Day aktsııasy aıasynda 232 saýda-oıyn-saýyq ortalyǵy men saýda úıi jeńildikter usynady. Olardyń qatarynda Astanadaǵy MEGA Silk Way jáne «Han Shatyr», Almatydaǵy MEGA Alma-Ata, MEGA Park pen Forum Almaty, sondaı-aq Shymkenttegi Mega Planet pen Shymkent Plaza bar.
Bereke Fest aktsııasyna bólshek saýda jelileriniń 417 dúkeni qosyldy. Olardyń qatarynda Magnum, SMALL, «Astyqjan» jáne GraMad bar. Merekelik usynystar elimizdiń basqa óńirlerindegi saýda nysandarynda da qoljetimdi.
-Bul aktsııalar tutynýshylardyń belsendiligin arttyryp, ishki saýdany damytýǵa baǵyttalǵan. Sondaı-aq merekelik naýqan taýarlardy tómendetilgen baǵamen satyp alý múmkindigimen qatar, saýda uıymdaryna kelýshiler sanyn men satý kólemin arttyrýǵa, al otandyq óndirýshilerge bólshek saýda jelilerindegi ónim úlesin ulǵaıtýǵa múmkindik beredi,-delingen habarlamada.
Jalpyulttyq naýqandy Qazaqstan Respýblıkasynyń Saýda jáne ıntegratsııa mınıstrligi jergilikti atqarýshy organdarmen birlesip uıymdastyrdy. Aktsııaǵa qatysýshy saýda nysandarynyń mekenjaılary kórsetilgen tolyq tizimi ákimdikterdiń resmı ınternet-resýrstarynda kórsetilgen. Jeńildikter mólsheri, taýar assortımenti jáne satyp alý sharttary týraly aqparatty saýda uıymdary jarııalaıdy.
Merekelik aktsııalar 2026 jylǵy 27 qazanda aıaqtalady.
Osyǵan deıin Respýblıka kúnine oraı dúkenderde 50%-ǵa deıin jeńildik bolatyny týraly jazdyq.
