Merekelik tartý: Aqmola oblysynda jańa mektep paıdalanýǵa berildi
QR Táýelsizdik kúni qarsańynda Arshaly aýdanynyń Jaltyrkól aýylynda 300 oryndyq mektep paıdalanýǵa berildi, dep habarlaıdy Kazinform tilshisi.
Aqmola oblysy ákimdigi baspasóz qyzmetiniń málimetinshe, mektep bilim berý ınfraqurylymyn qoldaý qorynyń qarajatyna salynǵan. Bilim berý nysanynda fızıka, hımııa, shetel tili, alǵashqy áskerı daıyndyq, tehnologııa, kompıýterlik pánder men bastaýysh synyptarǵa arnalǵan jalpy 21 kabınet bar, onda 250 oqýshy oqıdy.
Jumys istep turǵan negizgi mektep jańasynyń qoldanysqa engizilýine baılanysty jalpy bilim beretin mektep bolyp, buryn Jibek joly aýylynda bilim alǵan orta mektep oqýshylarynyń oqýyn jalǵastyrýyna múmkindik beredi.
Aımaq basshysy Marat Ahmetjanov jańa mektepte bolyp, ishin aralyp kórdi.
– Táýelsizdik merekesi qarsańynda jańa mekteptiń esigin aıqara ashýy barshamyz úshin úlken qýanysh. Sońǵy jyldary oblysymyzda úsh aýysymda oqytýdy joıý jumystary júrgizilýde. Memleket basshysy Qasym-Jomart Toqaev orta bilimniń sapasy tabysty ult bolyp qalyptasýdyń mańyzdy sharty ekenine árqashan basa nazar aýdarýmen keledi. Biz ózimizde oqıtyn árbir oqýshynyń sapaly bilim, sanaly tárbıe alyp, jan-jaqty damýy úshin barlyq qolaıly jaǵdaıdy jasaýymyz kerek, – dedi óńir basshysy.
Aýyl turǵyny Ómirzaq Qonarbaev jańa mekteptiń salynýyna úles qosqan azamattarǵa aýyldastary atynan alyǵysyn bildirdi.
– Jańa mekteptiń ashylyp jatqanyna óte qýanyshtymyz. Bul bizdiń aýyl úshin aıtýly oqıǵa. Alty nemerem osynda oqıdy, Jaltyrkól aýylyndaǵy mektep buryn da ıgi dástúrlerimen, joǵary jetistikterimen aty shyqqan mektep dep aýyz toltyryp aıta alamyn. Osy sabaqtastyq odan ári jalǵasyn taýyp, jańa oqý ornynda oqyǵan oqýshylarymyz zerdeli de zerek bolýyna tilektespin. Jańa mektep qabyrǵasynan jańa ómirge qadam basqan túlekter kúni erteń elimizge adal qyzmet etetin ónegeli azamattar bolyp shyǵatynan kámil senemin, – dep qýanyshyn jasyrmady turǵyn.
Mekteptiń ashylýyna oraı, «Sátti juldyz» seriktestigi aýyldyq jerlerdegi balalar arasynda ústeldik zııatkerlik oıyndardy damytýǵa baǵyttalǵan «Intellektýaldy konstrýktor synybyn» syıǵa tartty.
Aıta ketsek, bıyl Aqmola oblysynda 3592 oryndyq 5 jańa mektep paıdalanýǵa berildi. Al jalpy, «Jaıly mektep» ulttyq jobasy aıasynda aımaqta 22 600 oryndyq 18 mektep salý josparlanýda.
Eske salaıyq, budan buryn Astananyń irgesinde jańa sút zaýyty ashylǵanyn jazǵan edik.
