Merekelik marafon: Jibek Joly arnasyndaǵy jańa jyldyq telepremeralar
ASTANA. KAZINFORM – Jibek Joly/Silk Way telearnasy Jańa jyl qarsańynda arnaıy telebaǵdarlamalar ázirledi. Kórermen baǵdarlamalardy 31 jeltoqsannan bastap tamashalap, merekelik kóńil-kúıdi sezine alady. Kazinform tilshisi kestedegi Jańa jyldyq qyzyqty jobalarǵa kóz júgirtti.
31 jeltoqsan
11.30 – «Búgin.live» jobasynyń jańa jyldyq shyǵarylymy
Baǵdarlamany kórý arqyly bıyl el ómirinde qandaı eleýli ózgeris bolǵanyn bilýge bolady. Júrgizýshiler 2025 jyly qabyldanǵan zańdardy, oryn alǵan mańyzdy oqıǵalardy, jetken jetistikterdi túgendep, jylan jylynyń qorytyndysyn shyǵarǵan.
Baǵdarlamanyń tolyq mazmuny:
· Bas aspazdar men arnanyń telejúrgizýshileri básekesi
· Jyl qorytyndysy – Qazaqstannyń mádenıet, sport jáne t.b. salalardaǵy jetistikteri
· Ashyq mıkrofon: 2025 jyl nemen este qaldy?
· Sıýjet: QR Prezıdentiniń TRK komandasy Memleket basshysynyń jańa jyldyq quttyqtaýyna qalaı daıyndalýda?
· «Taza qala»: Ánýar Qarbozov pen Qyrmyzy Jandosova
Efır barysynda qalanyń túkpir-túkpirinen tikeleı baılanys jasalady. Jýrnalıster Esil jaǵalaýyndaǵy jańa jyldyq atmosferany jáne bazardaǵy reportaj arqyly qala turǵyndarynyń merekege qalaı daıyndalyp jatqanyn kórsetedi.
15.30 – «Jaqsy adam-2025» arnaıy syılyǵy
Efırde – bıylǵy jyldyń aıtýly azamattaryna arnalǵan «Jaqsy adam-2025» arnaıy syılyǵyn saltanatty tapsyrý rásimi. Munda tynymsyz eńbegimen el damýyna úles qosyp júrgen úzdik mamandar men jumysshylar, erligi arqyly kóptiń esinde qalǵan azamattar, ıgi isi jurtqa úlgi bolǵan úlken júrekti adamdar marapatqa ıe bolady.
Syılyqty tabystaý rásimine memleket jáne qoǵam qaıratkerleri, belgili tulǵalar men óner juldyzdary qatysady.
20.00 – «Jańa jyl – jańa shabyt» merekelik kontserti
Baǵdarlamada tanymal hıtter, jańa ánder, halyq áýenderi oryndalady. Sharada qazaqstandyq tanymal ánshiler boı kórsetpek. Olardyń qatarynda Álı Oqapov, Tamara Asar, Elızat Berikova, Jeńis Seıdollauly, Baǵym Muhıtdenova, Mádı Rymbaev, Serik Ibragımov, Marat Dýman, Ademi, Erkin Máýlen, Baıansulý jáne ózge de oryndaýshylar bar. Sondaı-aq joba qatysýshylary da sahnadan tabylady.
Aıta keteıik, kontsert «Kesh emes» jobasy aıasynda uıymdastyrylady. Bul – shyǵarmashylyq áleýetin ashýǵa umtylyp júrgen túrli jastaǵy áıelderdi qoldaýǵa arnalǵan joba.
Jańa jyldyq arnaıy shyǵarylymnyń júrgizýshileri – Nurlan Qoıanbaev, Dáýlet Bıjanov jáne Saltanat Serkebaeva. Stýdııaǵa bıyl túrli salada jetistikke jetken otandastarymyz shaqyrylǵan. Qazaqstan quramasynyń fýtbolshylary Sherhan Qalmyrza men Temirlan Anarbekov, qazaqstandyq ánshi Yenlik, sondaı-aq vıdeograf jáne trevel-bloger Dastan Muhamedkárimdi efırden kóremiz.
22.30 – QR Eńbek sińirgen qaıratkeri, akter-satırık Tursynbek Qabatovtyń jeke shyǵarmashylyq kontserti. Jobanyń basty kózdegeni merekelik keshte birneshe býyn ókilderin teledıdar aldyna jınap, jańa jylmen quttyqtaý. Sonymen qatar ádettegideı qoǵamda bolyp jatqan oqıǵalar men halyqtyń minez-qulqy, ál-aýqatyna qatysty máselerdi ádemi ári astarly ázilmen jetkizý, kórermen ezýine kúlki úıirip, jaıdary kóńil syılaý. Kontsertte elimizdiń tantsymal estrada juldyzdary óner kórsetedi.
23.50 – Jibek Joly telearnasynyń kórermenderi Memleket basshysynyń jańa jyldyq quttyqtaýyn tikeleı efır arqyly tamashalaıdy, sondaı-aq onyń qalaı daıyndalǵanyn baıandaıtyn fılmdi kórýge múmkindik bar. Onda Prezıdenttiń quttyqtaýyn ázirleý barysyndaǵy qupııa ári qyzyqty sátter taspalanǵan.
1 qańtar
1.00 – Nurlan Qoıanbaevpen «Jańa túngi stýdııa»
Nurlan Qoıanbaevpen «Jańa túngi stýdııa» shoýynyń kezekti qonaqtary kórermendi tańǵaldyrary sózsiz. Mysaly, stýdııaǵa bıylǵy jyldyń eń tanymal adamdary, ıaǵnı «Qaırat» fýtbol klýbynyń oıynshylary shaqyrylǵan. Olardyń biri – 2025 jylǵy Chempıondar Lıgasynyń úzdik qaqpashysy atanǵan Temirlan Anarbekov.
Sonymen qatar bıyl albomy Apple Music chartynda kósh bastap turǵan ánshi Yenlik, vıdeosy 698 mln jazylýshysy bar Instagram-nyń resmı paraqshasyna jarııalanǵan Dastan Muhamedrahym baǵdarlamada áńgime órbitedi. Al basty mýzykalyq hedlaınerler – Zengir, Rahat, Dilmuhammed, Nazarbek, Yenlik jáne ALEM.
12.30 – «Silk Way Star: Qosh keldiń, 2026!»
Jibek Joly telearnasy kórermenderge Silk Way Star halyqaralyq jobasynyń jańa jyldyq gala-kontsertin usynady. Bul jobaǵa qazaqstandyq jáne halyqaralyq jas oryndaýshylar qatysqan. Sahnada malaızııalyq ıAzmın Azız, armenııalyq Saro Gevorgıan jáne qyrǵyzstandyq Gúljigit Qalyqov án shyrqaıdy jáne ońtústik koreıalyq ánshi Shın Mın Chol «F4» doramasyndaǵy tanymal «Paradise» saýndtregin oryndaıdy.
Eske salaıyq, Silk Way Star – 12 eldiń ónerpazdarynyń basyn qosqan alǵashqy azııalyq mýzykalyq megajoba. Bıyl mońǵolııalyq Mıshel Djozef shoý jeńimpazy atandy.
