Merekelik demalysta QTJ poıyzdary 860 myńnan astam jolaýshyny tasymaldaǵan
ASTANA. KAZINFORM – Naýryz aıyndaǵy merekelik demalysta «Jolaýshylar tasymaly» AQ poıyzdary arqyly 860 myńnan astam jolaýshy qatynaǵan. Bul týraly «Jolaýshylar tasymaly» AQ baspasóz qyzmeti málim etti.
Tasymal kompanııasynyń málimetinshe, mereke kúnderi jolaýshylar arasynda Astana-Almaty, Astana-Shymkent, Shymkent — Aqtóbe jáne Pavlodar — Astana baǵytyndaǵy poıyzdarǵa suranys joǵary bolǵan. 7, 9, 21 jáne 23 naýryz kúnderi aralyǵynda jolaýshylardyń qarasy kóp bolǵan.
«Mereke kúnderi tasymalǵa suranystyń joǵarlaýyna baılanysty «Jolaýshylar tasymaly» AQ qosymsha 3 poıyz jáne vagondar tirkeý esebinen jolaýshylarǵa 30 myńnan astam qosymsha oryn usyndy. Sonymen qatar, qala mańyndaǵy baǵyttarǵa elektrpoıyzdardyń 4 reısi qosylyp, poıyzdardyń quramy ulǵaıtyldy» — delingen habarlamada.
Aıta keteıik, jyl saıyn ulttyq tasymaldaýshynyń poıyzdaryn 13 mıllıonnan astam jolaýshy paıdalanady.
