Merekeler qarsańynda QTJ qosymsha poıyzdar qosty
«Jolaýshylar tasymaly» AQ Táýelsizdik kúni merekesi men Jańa jyl meıramy qarsańynda poıyz bıletterine suranystyń artatynyna baılanysty birneshe baǵyt boıynsha qosymsha poıyzdar qosyp otyr, dep habarlaıdy Kazinform.
Qosymsha poıyzdar kelesi baǵyttar boıynsha qatynaıdy:
- №201/202 «Nur-Sultan 1 - Shymkent» baǵytynda: elordadan 3 poıyz shyǵady – 2023 jyldyń 15, 29 jeltoqsanynda jáne 2024 jyldyń 1 qańtarynda. Shymkentten keri shyǵatyn kúnder – bıylǵy 16, 30 jeltoqsan men 2024 jyldyń 2 qańtary.
- №203/204 «Nur-Sultan Nurly jol - Almaty 2» baǵytynda: «Nurly jol» vokzalynan 5 poıyz shyǵady – osy jyldyń 15, 28, 29 jeltoqsanynda jáne 2024 jyldyń 1, 2 qańtarynda. Almaty 2 vokzalynan keri qaıtatyn kúnder – 16, 29, 30 jeltoqsan jáne 2024 jyldyń 2, 3 qańtary.
Quram standartty kýpe men platskart vagondarynan turady.
Sondaı-aq №7510/7509 elektr poıyzynyń Astanadan Pavlodar baǵytynda qosymsha reısteri qosylady. Poıyz elordadan osy jyldyń 15, 29, 30 jeltoqsanynda, al keri baǵytta – bıylǵy jyldyń 18 jeltoqsanynda jáne 2024 jyldyń 2 qańtarynda júredi.
«Budan basqa suranysy kóp baǵyttar boıynsha tehnıkalyq múmkindik bolǵan jaǵdaıda jolaýshylar poıyzdaryna qosymsha vagondar qosylady», - delingen málimette.
Eske salaıyq, 21 qarashada Úkimette ótken baspasóz máslıhatynda QTJ basshysy Nurlan Saýranbaev jańa jyl merekesi kúnderine Almaty men Astana arasyndaǵy poıyzdarǵa bılet qalmaǵanyn aıtqan edi. Sol sebepti qosymsha poıyzdar qosylatynyn atap ótti.
