Merekege oraı ashylǵan rolıkodromǵa myńnan astam elordalyq bala keldi
ASTANA. QazAqparat - Búgin elordada Halyqaralyq balalar kúni atalyp ótýde. Qala aýmaǵynda túrli merekelik sharalar uıymdastyrylyp jatyr. «Alaý» muz saraıynda osy ataýly kúnge oraı rolıkodrom ashyldy. Jazǵy sport ortalyǵyna 1000 astam bala kelip, rolık teýip, badmınton men ústel tennısin oınady, dep habarlaıdy elorda ákimdiginiń resmı saıty.
Jalpy aýdany 5000 sharshy metrdi quraıtyn rolıkdrom Astananyń barlyq búldirshinin syıǵyza aldy. Uıymdastyrýshylar konkı men rolık tebýge áli beıimdelmegen balalar úshin arqan tartys oıynyn ótkizdi.
Túrli jarystar men sheberlik saǵattarynan ózge kópshilik nazaryna muz aıdyndaǵy merekelik shara usynyldy. Kontserttik baǵdarlama aıasynda ǵajaıyp anımatsııalyq kórsetilim men akvagrım balalardyń kóńilin kóterdi.
«Bizdiń maqsatymyz - qalalyq sport ortalyǵyn qurý. Balalarda sportpen aınalysý múmkindigi bolýy kerek, - dedi «Alaý» muz saraıynyń dırektory Naıl Nýrov. - Qalalyq ákimdiktiń qoldaýymen erteńnen bastap 500 astam mektep janyndaǵy lager tárıbelenýshisi atalmysh sport ortalyǵyna keletin bolady. Olar úshin arnaıy jeńildikter qarastyrylǵan».
