Merekeden keıin ózińdi qalaı tez qalypqa keltirýge bolady – maman keńesi
Búgin túnde Jańa jyldy qarsy alamyz. Otbasylyq mereke birneshe kúnge sozylady. Meıram qarsańynda Kazinform agenttiginiń tilshisi QR PІB MO medıtsınalyq tehnologııalar jáne aqparattyq júıeler ortalyǵynyń (MTAJO) prezıdenti Qazı Tileýbekovten keńes suraǵan edi.
- Qazı myrza, merekelik qarbalas pen demalys kúnderinen keıin óz-ózińdi qalypqa keltirýdiń tez joldary qandaı, atap ótseńiz...
- Іsterińizdi tórt sanatqa bólińiz. Mańyzdy jáne shuǵyl, mańyzdy biraq shuǵyl emes, mańyzdy emes jáne shuǵyl da, mańyzdy da emes. Sońǵysy týraly múldem umytýǵa bolady. Basymdyqtardy anyqtaǵannan keıin mańyzdy jáne shuǵyl isterden bastańyz. Óz-ózin ýaqytyly basqarýdyń belgili bir ádisteri bar. Olar jumysqa tezirek kirisýge jáne kásibı qyzmetti tıimdi jalǵastyrýǵa kómektesedi. Solardyń biri – «Qurbaqany jeý» (Poedanıe lıagýshkı) nemese «asap jeý» dep atalady.
- Bul baǵytta halyqaralyq tájirıbe ne deıdi?
- Atalǵan ádis týraly áıgili bıznes-jattyqtyrýshy Braıan Treısı jıi aıtady. Onyń máni – siz úshin eń qıyn jáne jaǵymsyz tapsyrmany birinshi oryndaýyńyzda. Muny tańerteń jasaý kerek, ıaǵnı mı áli aqparatpen qanyqpaǵan kezde, oǵan qıyn jáne energııany qajet etetin nárseni jeńý áldeqaıda ońaı. Siz á degende asap jeýden keıin basqa iske tez kirisip kete alasyz. Ádette, oǵan kóp ýaqyt qalady.
- Ýaqytty únemdep, sharýany tez tyndyrý úshin «olardy jeýdiń» taǵy qandaı túri bolady?
- Maman usynǵan taǵy bir ádis – «Pildi tilimdep jeý» (Poedanıe slona po kýsochkam) dep atalady. Bul úlken tapsyrmany kishigirim tapsyrmalarǵa bólýdi bildiredi. Sizdiń aldyńyzda úlken joba turǵan kezde osy ádisti qoldanǵan jaqsy. Mı jumysyn shoshytpaý úshin kólemdi tapsyrmany shaǵyn bólikterge bólgen jón. Sodan keıin ony eńserý áldeqaıda ońaı. Mysaly, siz jańa jobany qolǵa alǵanda ony birden oryndamaı shaǵyn qadamdarǵa bólý sekildi.
- Jańa jyldy qarsy alyp, merekeden soń óz-ózine kelýde, iske tez qaıta kirisýde dedlaın mańyzdy shyǵar?
- Kez kelgen tapsyrmany nemese jobany oryndaýdyń naqty merzimderin belgileý mańyzdy. Ýaqyt kestesi anyq bolǵan kezde, bul bizdi tezirek jumys isteýge yntalandyrady jáne keıinge qaldyrýdy jeńýge kómektesedi.
- Suhbatyńyzǵa rahmet.
