Merekedegi demalys kúnin basqa jumys kúnine aýystyrý tártibi ózgere me
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova Májilis depýtattarynyń merekelik demalys kúnderin basqa jumys kúnine aýystyrý tártibin ózgertýge qatysty saýalyna jaýap berdi.
— Mereke kúnderi jumys ýaqytyn utymdy paıdalaný maqsatynda demalys kúnderi basqa jumys kúnderine aýystyrylýy múmkin. Demalys kúnderin aýystyrý eńbekti uıymdastyrýdy, otbasylyq demalysty, mádenı-buqaralyq jáne korporatıvtik is-sharalardy, sondaı-aq solarmen baılanysty shyǵyndardy tıimdi josparlaýǵa múmkindik beredi. Demalys kúnderin aýystyrý aldaǵy kúntizbelik jylǵa aldyn ala júzege asyrylady jáne jumys jáne mereke kúnderiniń sáıkes kelýin eskere otyryp, sondaı-aq eldegi ekonomıkalyq, saıası nemese sanıtarlyqepıdemıologııalyq jaǵdaılarǵa baılanysty ár ýaqytta jeke anyqtalady. Osyǵan baılanysty demalys kúnderin basqa jumys kúnderine aýystyrýdyń qoldanystaǵy tártibi ońtaıly dep sanaımyz, — dedi mınıstr jaýabynda.
Aıta keteıik, Májilis depýtattary Úkimet pen Eńbek jáne halyqty áleýmettik qorǵaý mınıstrligine demalys kúnderin aýystyrý týraly sheshimdi keminde aldaǵy 2 kúntizbelik jylǵa aldyn ala qabyldaýdy usynǵan edi. Mysaly, 2025 jyly 2025 jylǵy 1 qańtar men 2027 jylǵy 31 jeltoqsan aralyǵyndaǵy kezeń boıynsha demalys kúnderin aýystyrý jóninde sheshim qabyldaý qajet.
Aıta ketelik 1 maýsym memlekettik mereke retinde belgilenýi múmkin ekenin jazǵan edik.