Merekede ishki ister organdarynyń jeke quramy kúsheıtilgen qyzmetke kóshedi
NUR-SULTAN. QazAqparat – Merekelik is-sharalar kezinde polıtsııa avtopatrýlderiniń sany kóbeıtiledi. Bul týraly QR Іshki ister mınıstrliginiń resmı ókili Nurdildá Oraz brıfıngide málim etti, dep habarlaıdy QazAqparat tilshisi.
«Jańa jyl qarsańynda ishki ister organdarynyń jeke quramy kúsheıtilgen qyzmetke kóshedi. Polıtsııa quqyqtyq tártip pen azamattardyń qaýipsizdigin, jol qaýipsizdigin qamtamasyz etý, sondaı-aq quqyq buzýshylyqtar men qylmystardyń aldyn alý boıynsha is-sharalar keshenin júrgizip jatyr. Quqyq buzýshylyqtar týraly habarlamalarǵa ýaqtyly den qoıý úshin merekelik is-sharalar kezinde polıtsııa avtopatrýlderiniń sany kóbeıtiledi», - dedi resmı ókil.
Onyń aıtýynsha, is-sharalar ótkiziletin jáne azamattardyń jappaı qydyratyn oryndarynda, kóshelerde polıtsııa narıadtarynyń, onyń ishinde jaıaý narıadtardyń sany artady. Qoǵamdyq oryndarda beınebaqylaý kúsheıtiledi.
Budan buryn habarlanǵandaı, apta ishinde 3031 qylmys tirkelip, táýlik ishinde onyń 1977-siniń beti ashyldy.
