Mereke jáne ataýly kúnderge oraı 7000-nan astam elorda turǵynyna bir rettik áleýmettik kómek kórsetildi
ASTANA. 4 naýryz. QazAqparat - Astanada turǵyndardyń birneshe sanatyna aqshalaı áleýmettik kómek kórsetiledi.
Olardyń qatarynda Uly Otan soǵysynyń ardagerleri men múgedekteri, aýǵan soǵysynyń ardagerleri, jetim balalar jáne taǵy basqalar bar, dep habarlady Astana qalasynyń resmı saıty.
Aǵymdaǵy jyldyń aqpan aıynda Astana qalasynyń Jumyspen qamtý jáne áleýmettik baǵdarlamalar basqarmasy mereke jáne aıtýly kúnderge oraı myna sanattaǵy turǵyndarǵa úsh myń teńge mólsherinde bir rettik áleýmettik kómek kórsetti:
Aýǵan soǵysynyń ardagerleri men múgedekteri (15 aqpan - Keńes áskeriniń Aýǵanstannan shyǵarylǵan kúni) - 1 112 adamǵa, «Altyn alqa» jáne «Kúmis alqa» tósbelgilerin alǵan kópbalaly analar, tórt jáne odan da kóp balasy bar otbasylar (8 naýryz - Halyqaralyq áıelder kúni) - 6 552 adamǵa kómek kórsetildi.
Mereke jáne ataýly kúnderge oraı bir rettik áleýmettik kómek Astana qalasy máslıhatynyń 2010 jylǵy 13 jeltoqsandaǵy № 410/54-IV sheshimimen bekitilgen «Astana qalasyndaǵy muqtaj azamattardyń jekelegen sanattaryna áleýmettik kómek kórsetý erejeleri» negizinde kórsetildi.
«Kazkommertsbank» AQ, «ATF bank» AQ, «Eýrazııalyq bank» AQ, «Metrobank» AQ, «Nurbank» AQ, DBAO «Jınaq banki» AQEB , «Fortebank» AQ jáne «Bank Tsentr Kredıt» AQ bankterinen zeınetaqy jáne járdemaqy alatyn, joǵaryda atalǵan sanatqa jatatyn tulǵalarǵa osy áleýmettik kómekti kórsetý úshin Astana qalasyndaǵy basqa ekinshi deńgeıli bankten ashqan jeke nemese karta shotyn berýin suraımyz. Óıtkeni, joǵaryda atalǵan bankter basqarmamen jumys istemeıdi», - delingen habarlamada.
Shotty Astana qalasynyń Jumyspen qamtý jáne áleýmettik baǵdarlamalar basqarmasyna (ardagerlermen jáne múgedektermen jumys isteý bólimi) ákelý qajet. Meken-jaıy: Imanbaeva 16, №6 kabınet, baılanys telefony: 21-65-09.
