Mereke kúni soltústikqazaqstandyq 80 otbasy baspanaly boldy

PETROPAVL. QazAqparat - Soltústik Qazaqstan oblysynyń Aıyrtaý aýdany Saýmalkól eldi mekeniniń 80 otbasy mereke kúni kópten kútken páterge qol jetkizdi, dep habarlaıdy QazAqparat tilshisi.

SQO ákimi baspasóz qyzmetiniń habarlaýynsha, Saýmalkólde 5 qabatty 80 páterlik úı paıdalanýǵa berildi. Qurylysty merdiger kompanııa «Soltústik Qurylys» JShS júrgizgen.

Qonys toıyn toılaýshylardy SQO ákiminiń orynbasary Asqar Saqypkereev quttyqtady.

«Qazaqstan halqynyń birligi kúni Sizderge jańa páterdiń kiltin tapsyrǵanyma qýanyshtymyn. Búgin kópbalaly otbasylar, bıýdjettik uıymdardyń qyzmetkerleri, múmkindigi shekteýli jandar jáne jetim balalar baspanaly bolyp jatyr. Shańyraqtaryńyzdan baqyt, qyzyq-qýanysh, molshylyq ketpesin», - dedi Asqar Jolamanuly.

Saýmalkóldik Olga Anofreva-Belıaeva segiz jyl baspana kezeginde turǵan eken. Olar kúıeýi ekeýi tórt bala ósirip, tárbıelep otyr. Balalarynyń bireýi - múgedek.

«Biz buǵan deıin baspana jaldap keldik. Otbasylyq bıýdjettiń basym bóligi osy maqsatqa jumsalatyn. Búgin bizge ekinshi qabattan 3 bólmeli páter buıyrdy. Biz - baqyttymyz. Barlyǵyna alǵys aıtamyn!», - deıdi qýanyshymen bólisken ana.

Al Ásemgúl Janyqulovaǵa 4 bólmeli páter berildi. Jalǵyzbasty áıel alty balany ósirip jatyr. Qıyndyqty kóp kórgen ana bul túni qýanyshtan tańǵa deıin uıyqtamapty.

«Páterler jyly, jaıly. Edenine lınoleým tóselse, tóbesi tartylǵan. Gaz plıta ornatylǵan», - deıdi Ásemgúl.

Úıdiń aınalasy da abattandyrylyp, kóshetter otyrǵyzylypty.