Mereke kúni baıanaýyldyq segiz otbasy baspanaly boldy
ASTANA. QazAqparat - Baıanaýyl aýdany ortalyǵynda «Nurly jer» baǵdarlamasy negizinde baspana boı kóterip, Táýelsizdik merekesinde segiz otbasy qonys toıyn toılady, dep habarlaıdy pavlodarnews.kzi.
Aýyl halqy aldynda aýdan ákimi Orazgeldi Qaıyrgeldınov jańa páterlerdiń kiltterin tabystady.
«Barshalaryńyzdy Táýelsizdik kúnimen quttyqtaımyn. Elimizdiń egemendigi máńgi, abyroıy bıik bolsyn! Búgin qýanyshqa kenelip otyrǵan otbasylardyń berekesi arta bersin. Aýdanymyzdyń kórkeıip, gúldenýi jolynda birneshe jyldan beri eńbek etip kele jatqan úı kezeginde turǵan azamattar men azamatshalar baspanaly bolyp otyr. Biz «TSK-Stroı» JShS-men kelise otyryp, osynaý turǵyn úılerdi kompanııanyń óz qarajatyna saldyq. Endi tolyq jóndeý jumystary aıaqtalǵannan keıin oblys ákimi Bolat Jumabekulynyń qoldaýymen ol kompanııadan satyp alatyn bolamyz», - dedi Orazgeldi Qaıyrgeldınov.
Sonymen birge, aýdan ákimi 24 páterlik qos qabatty turǵyn úıdiń de qurylysy naýryz aıynda aıaqtalyp, paıdalanýǵa beriletinin jetkizdi. Mereıli merekede baspanaly bolǵan aýdandyq aýrýhananyń akýsher gınekolog dárigeri Gúlnar Júnisova men Ońtústik Qazaqstan oblysynan qonys aýdaryp kelip, Sh.Aımanov atyndaǵy gımnazııa mektebi janynan qurylǵan «Balalar shyǵarmashylyq úıiniń» jetekshisi Nurlan Seıitov barsha qýanysh ıeleriniń atynan el egemendiginiń 26 jyldyǵymen quttyqtap, aýdan basshylyǵyna alǵys bildirdi.
