Mereke kúni aýa raıy qandaı bolady
ASTANA. QazAqparat - Sınoptıkter 16 jeltoqsan -QR Táýelsizdik kúni merekesine arnalǵan aýa raıy boljamyn jarııalady.
«Qazgıdromet» RMK-nyń málimetterine qaraǵanda, atmosferalyq tsıklonnyń jáne onymen atmosferalyq aǵyndardyń ótýine baılanysty respýblıka boıynsha barlyq jerde jaýyn-shashyn bolady.
Qazaqstannyń ońtústik-batysynda, kúndiz keı jerlerinde qatty jaýyn-shashyn bolady. Keı jerlerde tuman túsip, kóktaıǵaq, burqasyn bolady, jel kúsheıedi.
Aqmola, Atyraý, túnde Batys Qazaqstan oblystarynyń keı jerlerinde tuman, burqasyn bolýy yqtımal.
Atyraý jáne Batys Qazaqstan oblystarynda kóktaıǵaq bolady.
Jambyl, Qyzylorda, Mańǵystaý, Aqtóbe, Qostanaı, Qaraǵandy oblystarynyń keı jerlerinde tuman túsip, kóktaıǵaq bolady.
Mańǵystaý oblysynda kúndiz keı jerlerde qatty jaýyn-shashyn, Jambyl, Qyzylorda, kúndiz Qaraǵandy oblystarynyń keı jerlerinde jel sekýndyna 15-20 metrge deıin uıtqıdy. Jambyl oblysynda jeldiń ekpini 23-28 m/s-qa kúsheıedi.
Almaty, Túrkistan, Soltústik Qazaqstan, túnde Pavlodar, Shyǵys Qazaqstan oblystarynyń keı jerlerinde tuman túsedi.
Túrkistan, Shyǵys Qazaqstan, kúndiz Almaty oblystarynyń keı jerlerinde jeldiń ekpini sekýndyna 15-20 metrge jetedi.
Kúndiz Shyǵys Qazaqstan oblysynda keı jerlerde burqasyn, kóktaıǵaq bolady dep kútilýde.
