Mereke kúni anasyn óltirgen jigit psıhıatrııalyq dıspanserde esepte turǵan
QARAǴANDY. QazAqparat - Óz anasyn útikpen uryp óltirip, artynsha sýıtsıdke barǵan Qaraǵandynyń 33 jastaǵy turǵyny psıhıatrııalyq dıspanserde esepte turǵan, dep habarlady «QazAqparat» HAA tilshisi.
Úlken uly gúl alyp, anasyn 8 naýryz merekesimen quttyqtaýǵa kelgen. Kire sala kórgeni - polıtseıler, óli jatqan anasy, al balkonnyń astynda ortańǵy inisiniń denesi jatty. 
«Darıǵanyń «kómektesińder» degen daýysyn estidim, páteraralyq qabyrǵany urdym. Onyń «ulym men seniń anańmyn ǵoı!», dep aıǵaılap jatqany estildi. Birden polıtsııaǵa habarlastym. Olar kelgende, ol anasyn óltirip, ózi besinshi qabattyń balkonynan sekirip ketken», - dep eske aldy kórshisi Saltanat.
Anasyn óltirgen jigit psıhıatrııalyq klınıkada esepte turǵan.
«Ol uzaq ýaqyt Qaraǵandyda turǵan joq, Shymkentte tátesiniń qolynda boldy. Taıaýda tátesi qaıtys bolyp, Darıǵa Ońtústik Qazaqstanǵa jerleý rásimine baryp keldi. Sol jaqtan ulyn birge ertip keldi. Ol eshqaısymyzben aralasqan joq. Darıǵanyń minezi ashyq bolatyn, ózi turyp jatqan úıdegi azyq-túlik dúkeninde jumys istedi», - dedi kórshisi Lıýbov.
Segizinshi naýryzda Darıǵa aýysymnan shyǵyp, dúken ákimshiliginen gúl alyp, úıine qaıtqan. Bir saǵattan soń osy qaıǵyly jaǵdaı oryn aldy.
33 jastaǵy er adam óz anasyn óltirip, bes qabatty úıdiń balkonynan sekirip ketkenin buǵan deıin habarlaǵan edik. ІІD baspasóz qyzmetinen habarlaǵandaı, QR QK 99-baby boıynsha qylmystyq is tergelýde.
