Mereke kúni 400-den astam elordalyq otbasy baspanaly boldy
Búgin astanalyq otbasylarǵa qala ákimdiginiń tapsyrysymen «Nurly jer» baǵdarlamasynyń aıasynda turǵyzylǵan 364 páter kilti tabys etildi, onyń 182-i turmysy tómen otbasy.
«Qazirgi tańda turǵyndardy baspanamen qamtý baǵytynda naqty sharalar qabyldanyp, birqatar baǵdarlamalar júzege asyrylýda. Sonyń nátıjesinde búgingi merekege baılanysty 400-den astam astanalyq baspanaly boldy. Bul ár otbasy úshin erekshe qýanysh. Jalpy bıylǵy jospar boıynsha 1,9 myń páterden turatyn 7 turǵyn úı kesheni paıdalanýǵa beriledi», - dedi qala ákimi Baqyt Sultanov.
Eske sala ketsek, B.Sultanov jýyrda elordalyq kópbalaly jáne turmysy tómen otbasylarmen kezdesý barysynda ákimdiktiń turǵyn úı málesesine qatysty bıylǵy josparymen tanystyrǵan bolatyn.
«Turmysy tómen jáne kópbalaly otbasylardy tolǵandyratyn basty máselelerdiń biri turǵyn úı. Búginde bas qalada 45 myń adam turǵyn úı kezeginde tur, onyń 20 myńynyń turmysy nashar, kópbalaly jáne múgedek múshesi bar otbasylar. 22 myń otbasy memlekettik qyzmet jáne bıýdjet qyzmetkerleri. Qazirgi ýaqytta osy tizimdegilerdiń 188-ine páter berildi, jalpy jospar boıynsha bıyl 781 páter berilýi tıis, biraq budan bólek jyl sońyna deıin áleýmettik jaǵynan osal topqa jatatyn otbasylarǵa qosymsha qarjylandyrý esebinen taǵy 1 800-1 900 páter beriledi», - dedi qala basshysy.
