Mereke kúnderi jappaı sharalardan bas tartyp, betperde rejımin qatań saqtaý kerek – dáriger
«Mereke kúnderi, sonyń ishinde Jańa jyl merekesi kezinde biz árqashan patsıentterdiń úlken aǵymyn kútemiz. Sebebi, jylda bolatyn statıstıkalyq derek osyny kórsetedi. Birinshi kezekte, bul petarda, otshashý jáne taǵy da basqa zattardy qaýipti paıdalanǵandaǵy jaraqattarǵa. Odan basqa turmysta bolatyn jaraqattar bar. Sondaı-aq, túrli taǵam nemese sýsynnan, ishimikten ýlanyp túsetinderdiń de qatary óte kóp», - dedi Birjan Ospanov.
Sonymen qatar, koronavırýsqa qatysty jaǵdaıdy eskere otyryp, Birjan Ospanov almatylyqtardy jappaı sharalar ótkizýden bas tartýǵa, sonyń ishinde mereke kezinde basqosýdy shekteýge shaqyrdy.
«Biz jaqyndarymyzben, dostarymyzben aralasyp turǵandy jaqsy kóremiz, ásirese mereke kúnderi olarmen birge bolǵymyz keledi. Qurmetti azamattar, biz sizderden baılanysty shekteýdi, kóp bolyp jınalmaýdy, osylaısha týystaryńyzdy qorǵaýdy suraımyz. Sebebi bul - óte ózekti másele. Týǵandaryńyzǵa janyńyz ashysa, solaı etkenińiz jón. Kópshilik is-sharalardy ótkizýden aýlaq bolý kerek. Vırýstyń baılanys jasaý jáne aýa tamshylary arqyly taralatynyn este ustaǵan jón. Betperde kıińiz, qolyńyzdy antıseptıkpen tazartyńyz, bólmelerdi dezınfektsııalańyz», - dedi ol.
Buǵan deıin Medıtsına ǵylymdarynyń kandıdaty, Qaraǵandy medıtsınalyq ýnıversıtetiniń Klınıkalyq farmakologııa kafedrasynyń meńgerýshisi, professor Sholpan Qalıeva koronavırýstan qorǵanýdyń basty faktorlaryn ataǵan bolatyn. Onyń aıtýynsha, maska taǵý, áleýmettik qashyqty saqtaý, dezınfektsııa vırýstan qorǵaıtyn basty sharalar bolyp otyr.
«Adamdar aýyra ma, aýyrmaı ma oǵan qaramastan kóp baılanysqa túspeýge tyrysý kerek. Adamdar aýyratynyn bilmeýi de múmkin. Sondyqtan, maska taǵýǵa mindetti. Óıtkeni maska vırýstyń 70 paıyzyn súzedi. Adam juqtyrǵan jaǵdaıda da vırýs júktemesy de az bolady. Qoǵamdyq oryndarǵa barǵan soń qoldy sanıtaızermen tazalaý kerek», - deıdi Sholpan Qalıeva.
Al Almaty qalasy Psıhıkalyq densaýlyq ortalyǵynyń dırektory Sapar Rahmensheev bıyl JRVI, tumaý, koronavırýs qatar júretinin aıtqan edi.
«Tumaý belgisin baıqasańyz mindetti túrde emhanaǵa júginý kerek. Ózin-ózi emdeýmen aınalysýdyń qajeti joq. Eń bastysy – dárigerlermen keńesken abzal. Habarlasqannan keıin dárigerler sizdi baqylaýǵa alyp, qajetti emdeýdi taǵaıyndaıdy», - dedi ol.
