Mereke kúnderi Shymkent qutqarýshylaryna qandaı shaqyrtýlar tústi

ShYMKENT. QazAqparat - Merekelik demalys kúnderi Shymkent qutqarýshylaryna 15 shaqyrtý túsken, dep habarlaıdy QazAqparat tilshisi.

Shymkent qalasy Tótenshe jaǵdaılar departamentiniń órt sóndirý bólimderi men jedel-qutqarý jasaǵynyń qutqarýshylary demalys jáne mereke kúnderi 15 shaqyrtýǵa bardy. Olardyń arasynda 10 órt sóndirý jaǵdaıy oryn aldy. Al «112» qutqarý qyzmetine 5 habarlama tústi.

«Shyǵys» shaǵynaýdanyndaǵy kópqabatty úıdiń páterinde 20 jastaǵy boıjetken saqınasyn sheshe almaı jatqany týraly habarlanǵan. Oqıǵa ornyna barǵan qutqarýshylar qyzdyń saýsaǵyndaǵy saqınany arnaıy quraldyń kómegimen sheship bergen.

Sondaı-aq Tsıalkovskogo kóshesi boıynda ornalasqan úıdiń esigin asha almaı qalǵan turǵyndarǵa da kómek berilgen. Úıdiń ishindegi 2 kishkentaı bala da aman-esen, anasymen qaýyshty.

Budan bólek, tótenshe jaǵdaı qyzmetkerleri «Shymsıtı» shaǵynaýdanyndaǵy kópqabatty úıdiń páterinde qulyptanyp qalǵan kishkentaı balany qutqardy.

Arnaıy mamandar balalarǵa abaı bolyp, olardy jalǵyz qaldyrmaýdy eskertti.