Mereke kúnderi qosymsha avıareıster men vagondar engizildi - QR Kólik jáne kommýnıkatsııa mınıstrligi
ASTANA. Shildeniń 3-i. QazAqparat - Mereke kúnderi qosymsha avıareıster men vagondar engizildi, dep habarlaıdy QR Kólik jáne kommýnıkatsııa mınıstrliginiń baspasóz qyzmeti.
Astana kúnine oraı, elordadaǵy mańyzdy oqıǵalardyń kýágeri bolam degender sany jyldan-jylǵa artyp keledi. Soǵan baılanysty bul mereke qarsańynda osy baǵytta jolaýshylar legi dep arta túsetini sózsiz. Osy suranysty qamtamasyz etý maqsatynda kólik kásiporyndary barlyq sharalar qoldanýda.
Aıtalyq, búgin, shildeniń 3-inde, «Eır Astana» avıakompanııasynyń Almaty - Astana - Almaty baǵytynda «Eırbastardy» «Boıng» áýe kemelerimen almastyryp, qosymsha reıster ashyldy. Atalǵan is-qımyl nátıjesinde osy baǵyttaǵy oryndar sanyn 650 birlikke kóbeıtýge múmkindik týdy. Bul sharalar budan bylaıǵy kúnderi de jalǵastyrylady.
Temir jol kóligi ákimshiligi de osyndaı sheshim qabyldady. Mereke kúnderi, onyń ishinde shildeniń 1-6-sy kúnderi aralyǵynda, 23 qatynas baǵyty boıynsha 60 qosymsha vagon qosyldy. Onyń basym bóligi Astanaǵa qatynaıtyn jáne ol arqyly ótetin poıyzdarǵa tirkelýde.
Áýe jáne temir jol kóligindegi ózgertýler men tolyqtyrýlar jaıly aqparatty áýejaı men temir jol vokzaldarynyń anyqtama qyzmetterinen alýǵa bolady.
