Mereke kúnderi elordanyń kommýnaldyq qyzmetteri demalyssyz jumys isteıdi
ASTANA. QazAqparat - Mereke kúnderi elordanyń kommýnaldyq qyzmetteri demalyssyz jumys isteıtin bolady, dep habarlaıdy qalalyq ákimdiktiń baspasóz qyzmeti.
«Astana sý arnasy» kásipornynda táýlik boıy kezekshilik júrgizilip, qosymsha brıgadalar uıymdastyrylady. Kompanııanyń habarlaýynsha, barlyq qyzmetter jumys isteıdi. Apat oryn alǵan jaǵdaıda kez kelgen ýaqytta dıspetcherlik qyzmetke habarlasýǵa bolady.
«Astana-Tazalyq» JShS Jańa jyl merekesi kúnderi eki aýysymmen jumys isteıdi. Qala kóshelerin jınaýǵa sypyrý, jınaý mashınalary men qar jınaýǵa arnalǵan tehnıka shyǵarylady. Trotýarlar men gúlbaqtardy sanıtarlyq tazartý jumystary saǵat 6:00-15:00 aralyǵynda júriziledi. Munymen qosa, tıisti jumystarǵa qosymsha brıgadalar tartylady.
«Astana-Tazartý» JShS qyzmetkerleri 31 jeltoqsanda saǵat 22.00-ge deıin jumys isteıdi. Al 1 qańtar kúni qoqys shyǵarý jumystary saǵat tańǵy 5-te bastalady. Qalǵan kúnderi ádettegideı jumys isteıdi.
Aıta keteıik, Astana qalasynyń ishki ister departamenti de 31 jeltoqsannan 4 qańtarǵa deıin, sondaı-aq 7-8 qańtar kúnderi kúsheıtilgen rejımde jumys isteıdi. Barlyǵy 1500 polıtsııa qyzmetkeri men QR ІІM Ulttyq ulannyń áskerı qyzmetshileri qoǵamdyq tártipti qadaǵalaıtyn bolady.
