Mereke kúnderi elordadaǵy emhanalar qalaı jumys isteıdi
NUR-SULTAN. QazAqparat – Elordada mamyr aıynyń mereke kúnderi medıtsınalyq uıymdar, ıaǵnı qalalyq MSAK uıymdary shtatty rejımde jumys isteıdi, dep habarlaıdy QazAqparat qala ákimdigine silteme jasap.
Qoǵamdyq densaýlyq saqtaý basqarmasy habarlaǵandaı qalalyq emhanalarda ýchaskelik dárigerler men mobıldi brıgadalar jumys isteıdi.
«Alda merekeler bar, alaıda biz halyqqa medıtsınalyq kómek kórsetý úshin úzdiksiz jumys isteı beremiz. Qajet bolǵan jaǵdaıda patsıentter ýchaskelik dárigerlerge júgine alady. Sol sııaqty saǵat 08:00-20:00-ge deıin jumys isteıtin kóshpeli brıgadalardy da shaqyra alady. Al «jedel járdem» qyzmeti táýlik boıy qyzmet etedi. Jedel shaqyrýlardyń 4 sanatyna emhanalardaǵy JMK qyzmet kórsetedi», - dedi Qoǵamdyq densaýlyq saqtaý basqarmasy basshysynyń orynbasary Álııa Rústemova.
Rústemova mereke kúnderi salalyq mamandar jumys istemeıtinin, al jeksenbide tek kezekshi dárigerler kómek kórsetetinin atap ótti.
«Qala turǵyndary mereke kúnderi óz emhanalarynyń koll-ortalyqtaryna nemese ýchaskelik dárigerlerge qońyraý shalady. Baılanys nómirleri olardyń saıttarynda jáne áleýmettik jelide kórsetilgen», - dedi ol.
