Mereke kúnderi elimizdiń basym aýmaǵynda qar jaýyp, burqasyndatady
ASTANA. QazAqparat - Mereke kúnderi, 15-17 jeltoqsan aralyǵynda elimizdiń basym bóliginde qar jaýyp, burqasyn soǵady.
Ortalyǵy Monǵolııada bolǵan qýatty antıtsıklon yqpalymen demalys kúnderi elimizdiń kóptegen oblystarynda jaýyn-shashynsyz aýa raıyn saqtaldy. Ári, aýa temperatýrasy shetki ońtústik aýdandardan basqa aımaqtarda qalyptydan 3-9º joǵary boldy. Al ońtústik aımaqtarda temperatýra qalypty temperatýradan 1-3º tómen boldy, dep habarlaıdy «Qazgıdromet» RMK.
Aldaǵy táýlikterde bul antıtsıklonnyń áseri saqtalady. Biraq Volga mańynda qalyptasqan tsıklon Qazaqstan arqyly soltústik-shyǵysqa jyljı bastaıdy. Sonyń saldarynan aldymen batysta, sodan soń mereke kúnderi - 16-17 jeltoqsanda elimizdiń qalǵan aımaqtarynda qar jaýýy, kóktaıǵaq bolyp, keı jerlerde jeldiń 15-25 m/s kúsheıýi jáne burqasyn soǵýy kútiledi.
Kúndiz aýa temperatýrasy burynǵydaı 0º shamasynda bolady, ol osy kezeńge tán ortasha kópjylǵy mánnen joǵary.
