Mereke kúnderi Astanadaǵy «Báıterek» monýmenti erekshe jaryqtandyrylatyn boldy
ASTANA. QazAqparat - Astanadaǵy Memleket basshysy Nursultan Nazarbaevtyń bastamasymen salynǵan basty kórikti oryndardyń biri «Báıterek» monýmenti búginde jańa kelbetke ıe boldy.
Londondaǵy áıgili Sharb záýlim ǵımaratyndaǵy jaryq dıodtar sany 11 myń ǵana bolsa, mundaǵy túrli-tústi jaryq dıodtar sany 12 myńnan asady. Monýmenttiń erekshe jaryqtandyrylýyn mereke kúnderi tamashalaýǵa bolady. «Báıterek» monýmentiniń túp bıigine shyǵyp, 97 metr bıiktikten qalanyń túngi kórinisin tamashalaı alasyz. Elimizdegi basty monýmenttiń bıiktigi el ordasyn Almatydan Astanaǵa aýystyrý jylyna baılanysty tańdalǵan. Monýment ejelgi ańyz jelisi boıynsha turǵyzyldy. «Báıterek» ornalasqan jeri men kompozıtsııalyq qurylysynda kóshpelilerdiń erekshe ǵaryshtyq túsinikteri kórinis tapqan. «Báıterek» sózi «ómir aǵashy» degen maǵynany bildiredi. Ǵımarat úsh bólikten turady. Nysannyń jer asty bóligi ulttyń tamyr jaıýynan ózekti oı órse, ekinshi-úshinshi bólikteri keıingi órkendeý kezeńderinen kórinister beredi. Monýmenttegi ekskýrsııalardy júrgizýshi Sáýle Súıindikovanyń aıtýynsha, munda eki kompozıtsııa ornalasqan, onyń biri «Aıaly alaqan» - Elbasy alaqanynyń izi. Adamdar oǵan qoldaryn qoıyp, nıetterin bildiredi. Sonda arman-tilegiń oryndalady degen nanym bar. Al «Jerasty álemi» kompozıtsııasy ulttyq mádenıettiń, kóshpelilerdiń rýhanı áleminen jáne tarıhı ótkeninen syr shertedi, munda Erbolat Tólepbaıdyń kartınalary ilingen. «Kelýshilerdiń 70-80 paıyzy Qazaqstan turǵyndary, sheteldikter de keledi, TMD elderinen keletin týrıster de kóp», - deıdi S.Súıindikova. «Báıterek» monýmenti kún saıyn saǵat 10:00-21.00 aralyǵynda jumys isteıdi. Eresekter úshin bılet quny - 500 teńge, 15 jasqa deıingi balalar úshin 150 teńge, dep habarlanǵan elorda ákimdiginiń resmı saıtynda.
